یونان:خوفناک ٹرین حادثے میں 26 افراد ہلاک اور درجنوں زخمی
یونان: لاریسا کے قریب خوفناک ٹرین حادثے میں 26 افراد ہلاک اور درجنوں زخمی ہوگئے۔
باغی ٹی وی : بین الاقوامی خبر رساں ادارے کے مطابق یونان کے شہر لاریسا کے قریب مخالف سمت سے آنے والے مسافر اور کارگو ٹرینیں ٹکرا گئیں جس کے نتیجے میں 26 افراد ہلاک اور متعدد زخمی ہو گئے۔
ریل آپریٹر ہیلینک ٹرین نے بتایا کہ ایتھنز سے تھیسالونیکی جانے والی مسافر ٹرین میں تصادم کے وقت تقریباً 350 مسافر سوار تھے،امدادی کارکن رات بھر ان مسافروں کو نکالنے کی کوشش کر تے رہے جو لاریسا شہر کے قریب حادثے کا شکار ہونے والی ایک ٹرین میں سوار تھے۔
ابھی تک یہ معلوم نہیں ہوسکا کہ تھیسالونیکی اور لاریسا کے درمیان سفر کرنے والی مسافر ٹرین سے ٹکرانے کی وجہ کیا تھی۔
فائر بریگیڈ حکام کے مطابق یونان کے شہر لاریسا کے قریب دو ٹرینوں کے آپس میں ٹکرانے سے کم از کم 26 افراد ہلاک اور 85 زخمی ہوئے ہیں تقریباً 150 فائر فائٹرز اور 40 ایمبولینسیں جائے وقوعہ پر موجود تھیں۔
فائر سروس کے ترجمان واسلیس ورتھاکوئینس نے صحافیوں کو بتایا کہ "تصادم کی شدت” کی وجہ سے امدادی کارکنوں کے لیے حالات "بہت مشکل” تھے۔
اسپتال انتظامیہ کا کہنا ہے کہ حادثہ میں زخمی ہونے والے 25 افراد کی حالت تشویشناک ہے۔
تھیسالی کے گورنر کونسٹنٹینوس اگوراسٹوس نے مقامی میڈیا کو بتایا کہ ایتھنز سے شمالی شہر تھیسالونیکی جانے والی ایک مسافر ٹرین اور تھیسالونیکی سے لاریسا جانے والی کارگو ٹرین وسطی یونانی شہر کے قریب آپس میں ٹکرائیں، تصادم بہت زوردار تھا،یہ ایک خوفناک رات تھی اس منظر کو بیان کرنا مشکل ہے۔”
انہوں نے کہا کہ پہلی 4 بوگیاں پٹڑی سے اتر گئیں جب کہ 2 مکمل طور پر تباہ ہو گئیں۔ اگوراسٹوس نے کہا کہ تقریباً 250 مسافروں کو بسوں میں تھیسالونیکی تک بحفاظت نکال لیا گیا ہے۔ ایتھنز سے تقریباً 380 کلومیٹر شمال میں تصادم کے بعد متعدد بوگیاں پٹری سے اتریں اور کم از کم 3 میں آگ لگی۔
