گوجرہ،باغی ٹی وی (نامہ نگارعبدالرحمن جٹ) ڈی پی او کی کھلی کچہری فوٹو سیشن تک محدود، شہری انصاف سے محروم
گوجرہ میں کینال ریسٹ ہاؤس دھماں بنگلہ میں منعقدہ ڈسٹرکٹ پولیس آفیسر ٹوبہ ٹیک سنگھ عبادت نثار کی کھلی کچہری کو شہریوں نے فوٹو سیشن قرار دے دیا۔
چک نمبر 301 ج ب کے رہائشی غلام حیدر کا کہنا ہے کہ ڈکیتی میں چھینی گئی موٹر سائیکل کا مقدمہ درج ہونے کے باوجود گیارہ کھلی کچہریوں میں پیش ہو کر بھی انصاف نہ ملا۔ ان کا مقدمہ ایک مبینہ پولیس مقابلے میں مارے گئے ڈاکو کے کھاتے میں ڈال دیا گیا، حالانکہ انہوں نے کسی کو نامزد ہی نہیں کیا۔
شہریوں کا الزام ہے کہ کھلی کچہریوں میں حقیقی مسائل کے حل کے بجائے طفل تسلیاں دی جاتی ہیں، جبکہ زیادہ تعداد ٹاؤٹس اور فرضی سائلین کی ہوتی ہے، جنہیں زبردستی لا کر بٹھایا جاتا ہے۔
شہریوں نے کھلی کچہریوں کو وقت کا ضیاع قرار دیتے ہوئے کہا کہ نہ تو سائلین کی موقع پر داد رسی ہوتی ہے اور نہ ہی ناقص کارکردگی والے اہلکاروں کے خلاف کوئی کارروائی کی جاتی ہے۔
