آئندہ سال حج میں پاسپورٹ کی ضرورت نہیں ہو گی

0
63

سعودی عرب نے آئندہ سال حاجیوں کے لیے ایسی سہولت متعارف کروانے کا فیصلہ کیا ہے کہ پاسپورٹ کی ضرورت بھی نہیں رہے گی۔

سعودی حکومت نے آئندہ سال ہر حاجی کو ’سمارٹ حج کارڈ‘ جاری کرنے کا فیصلہ کیا ہے جس کی وجہ سے حاجیوں کو ارض مقدس میں قیام کے دوران پاسپورٹ کی ضرورت نہیں ہوگی۔

یہ بھی ایک قسم کا شناختی کارڈ ہوگا جس میں حاجی کے مکمل کوائف، ویزے کی مدت، پیکیج کی تفصیلات، مکہ مکرمہ، مدینہ منورہ، منی، مزدلفہ، عرفات میں قیام کی جگہوں، خیموں کا پتہ، صحت معلومات اور دیگر ضروری کوائف درج ہوں گے۔

مقامی میڈیا کے مطابق وزارت حج وعمرہ نے سمارٹ حج کارڈ کی افادیت پر روشنی ڈالتے ہوئے کہا ہے کہ اس کی مدد سے حاجی کو سعودی ایئرپورٹ پر پاسپورٹ دکھانے کی ضرورت نہیں ہوگی۔

کارڈ کی مدد سے مقدس مقامات تک جانے کے لیے ٹرین کی ٹکٹ لینے کےلئے لمبی قطاروں میں کھڑا نہیں ہونا پڑے گا۔ قیام گاہ کا راستہ بھولنے پر کارڈ سکینر مشینوں سے خیمے کا پتہ معلوم کیا جا سکے گا۔ کارڈ کی مدد سے حاجی کا صحت ریکارڈ بھی چیک کیا جا سکے گا۔

سمارٹ کارڈ کے ذریعے حاجی کی لوکیشن بھی معلوم کی جا سکتی ہے ۔اس سے غیر قانونی حج کا مکمل خاتمہ ہوجائے گا۔ سعودی عرب میں غیر قانونی قیام اور ویزے کی مدت سے تجاوز کا بھی خاتمہ ہوجائے گا۔

وزارت حج کے مطابق سمارٹ کارڈ کی ایپلی کیشن موبائل پر ڈاون لوڈ کی جاسکتی ہے۔ ایپلی کیشن سے کارڈ سکین کرکے حاجی کی مکمل معلومات فراہم ہوجائیں گی۔

وزارت حج نے مزید کہا کہ منی میں غیر متعلقہ افراد کا خیموں میں داخلہ روکنے کےلئے بھی کارڈ کی مدد لی جائے گی۔ منی کے خیموں میں داخلے کےلئے کارڈ کا استعمال ہو گا۔ مکہ مکرمہ اور مدینہ منورہ میں بھی ہوٹلوں کے کمروں میں داخل ہونے کے لئے کارڈ کا استعمال ہوگا۔

Leave a reply