وفاقی وزیر خزانہ محمد اورنگزیب کا کہنا ہے کہ اگلے سال کا بجٹ ایف بی آر نہیں ٹیکس پالیسی آفس بنائے گا، ملک کو چلانے کیلئے ریونیو میں اضافہ ضروری ہے، ٹیکس اصلاحات کے حوالے سے تاجروں سے مشاورت ہورہی ہے۔
وفاقی وزیر خزانہ محمد اورنگزیب نے کراچی میں تاجروں کے ساتھ اجلاس میں گفتگو کرتے ہوئے کہا کہ بہت سے ممالک معاشی نظام میں اصلاحات کررہے ہیں، اگلے سال کا بجٹ ایف بی آر نہیں ٹیکس پالیسی آفس بنائے گا، ہم نے ریونیو اور اخرات دیکھ کر ملک کو چلانا ہے، ملک کو چلانے کیلئے ریونیو میں اضافہ ضروری ہے۔ان کا کہنا ہے کہ تاجر برادری کے ساتھ مل کر بجٹ بنائیں گے، چیئرمین ایف بی آر اس میں سیکریٹیریل سپورٹ فراہم کریں گے، ٹیکس اصلاحات کے حوالے سے تاجروں سے مشاورت ہورہی ہے، ہمیں ریونیو اور اخراجات کو ساتھ لیکر چلنا ہے۔محمد اورنگزیب کا کہنا ہے کہ ابھی ہم نے 500 ملین یورو بانڈ کی پیمنٹ کی ہے، سیلاب سے کے پی اور پنجاب بری طرح متاثر ہوا، معاشی استحکام کا فائدہ ہوا ہے کہ صوبائی حکومتوں نے اپنا خرچہ خود اٹھایا ہے۔
انہوں نے کہا کہ پہلی بار آٹو سیکٹر کی ایکسپورٹ ہوئی ہے، حکومت کو اپنے خرچے کم کرنا ہوں گے یہ بات واضح ہوگئی ہے، کسانوں کو بغیر ضمانت اور رہن رکھوائے بغیر قرضے دینا ہوں گے۔
