پاکستان نے اسرائیل کی جانب سے غزہ امن معاہدے کی خلاف ورزیوں کی شدید مذمت کرتے ہوئے صیہونی حملوں کو خطے میں امن کی کوششوں کیلئے سنگین خطرہ قرار دے دیا۔
ترجمان دفتر خارجہ نے کہا کہ اسرائیلی حملوں میں متعدد بے گناہ شہریوں کی شہادت ہوئی، یہ اقدامات بین الاقوامی قوانین اور انسانی حقوق کی کھلی خلاف ورزی ہیں۔ترجمان کا کہنا ہے کہ حالیہ امن معاہدہ اسرائیلی جارحیت سے پامال ہو رہا ہے، جس سے خطے میں پائیدار امن کی عالمی کوششوں کو نقصان پہنچ رہا ہے۔دفتر خارجہ نے عالمی برادری سے مطالبہ کیا کہ اسرائیل کی خلاف ورزیوں کا فوری نوٹس لیا جائے۔ترجمان نے اس عزم کا اعادہ کیا کہ پاکستان آزاد اور خودمختار فلسطینی ریاست کے قیام کا حامی ہے، جو 1967 سے پہلے کی سرحدوں پر قائم ہو۔
