fbpx

ہمایوں سعید کے اصرار پر شائستہ لودھی 4 سال بعد اسکرین پر دوبارہ واپسی کے لئےتیار

مارننگ شو کی سابق میزبان و اداکار شائستہ لودھی چار سال کے طویل عرصے بعد دوبارہ اسکرین پر اداکاری کرنے کے لیے تیار ہیں-

باغی ٹی وی : شائستہ لودھی جلدہی ڈرامے میں اداکاری کرتی نظر آئیں گی خبریں ہیں کہ ان کے آنے والے ڈرامے کی شوٹنگ جاری ہے۔

شائستہ لودھی کی ٹیم کے ایک رکن نے نجی ٹی وی چینل کو دیئے گئے انٹرویو میں تصدیق کی کہ شائستہ لودھی جلد ہی ٹی وی پراداکاری کرتی دکھائی دیں گی۔

اداکارہ کی ٹیم کے رکن کے مطابق شائستہ لودھی اداکارہ مرینا خان کی ہدایت کاری میں بننے والے میگا سیریل ڈرامے ’پردیس‘ میں ایک شادی شدہ خاتون کا کردار ادا کرتی دکھائی دیں گی-

’پردیس‘ میں شائستہ لودھی ایک ایسی پاکستانی خاتون کا کردار ادا کرتی دکھائی دیں گی، جن کے شوہر کمائی کے سلسلے میں بیرون ملک مقیم ہوتے ہیں اور ایک دوسرے سے دوری خاندان کی خوشیوں میں دراڑیں ڈالتی ہے۔

ڈرامے میں دکھایا گیا ہے کہ کس طرح روزگار کے سلسلے میں اہلیہ اور خاندان سے دور رہنے والا شخص ’پردیس‘ میں خاندان کی خوشیوں سے دور رہتا ہے اور کس طرح ایک دوسرے سے عیلحدگی کی وجہ سے میاں اور بیوی کے تعلقات اثر انداز ہوتے ہیں۔

ڈرامے میں شائستہ لودھی کو ایک مضبوط خاتون کے ساتھ ہی انہیں ایک روایتی پاکستانی خاتون کے طور پر بھی پیش کیا گیا ہے۔

اداکارہ کی ٹیم کے رکن نے مزید بتایا کہ شائستہ لودھی مذکورہ ڈرامے پر اداکار ہمایوں سعید کے کہنے کی وجہ سے کام کر رہی ہیں انہوں نے ہی اداکارہ کو راضی کیا اور وہ اس شرط پر ’پردیس‘ میں کام کرنے پر رضامند ہوئیں کہ مذکورہ ڈرامے کی ہدایات مرینا خان دے رہی ہیں۔

’پردیس‘ کی دیگر کاسٹ میں سرمد کھوسٹ، بشریٰ انصاری، گوہر رشید، شرمین علی، افن وحید اور دیگر اداکار شامل ہیں ڈرامے کو کب تک ریلیز کیا جائے گا ابھی یہ واضح تو نہیں تاہم امید ہے کہ ڈرامے کو عیدالفطر کے بعد ریلیز کیا جائے گا۔

واضح رہے کہ شائستہ لودھی کو آخری بار 2017 میں نجی ٹی وی چینل جیو ٹی وی کے ڈرامے ’خان‘ میں دکھائی دی تھیں مذکورہ ڈرامے سے قبل ہی شائستہ لودھی شوبز کی دنیا سے دور ہوگئی تھیں اور انہیں نے غیر اعلانیہ طور پر شوبز کو خیرباد کہا تھا تاہم وہ مختلف تقریبات میں دکھائی دیتی رہی تھیں۔

سال 2019 میں انہوں نے ثمینہ پیرزادہ کو دیئے گئے ایک انٹرویو میں شوبز کو چمکتی ہوئی دنیا قرار دیتے ہوئے کہا تھا کہ شوبز انڈسٹری میں آنے کے 2 سال بعد ہی انہیں احساس ہوگیا تھا کہ وہ غلط جگہ پر آ گئی ہیں اور یہ دنیا صرف چمک کی دنیا ہے، جہاں ہر چیز مصنوعی ہے۔

انہوں نے کہا تھا کہ شوبز کی وجہ سے وہ اپنے خاندان کو مناسب وقت نہیں دے پا رہی تھیں اور ان کی زندگی متاثر ہو رہی تھی، اس لیے انہوں نے شوبز سے دوری اختیار کرلی۔

جواب چھوڑیں

آپ کا ای میل ایڈریس شائع نہیں کیا جائے گا.