اہلیہ کے بیگ سے شوہر کی ہڈیاں برآمد

0
113

برلن : اہلیہ کے بیگ سے شوہر کی ہڈیاں برآمد, میونخ ایئرپورٹ پولیس نے شک کی بنیاد پر عمر رسیدہ خاتون کو روک کر سامان کی تلاشی لی، باکس میں سے برسوں قبل مرنے والے شوہر کی ہڈیاں برآمد ہوئیں۔

غیر ملکی خبر رساں ادارے کی رپورٹ کے مطابق انسانی باقیات ایک ملک سے دوسرے ملک لےجانے کا حیران کن واقعہ یورپی ملک جرمنی کے صوبے باویریا میں پیش آیا، ایئرپورٹ پر تعینات پولیس اہلکاروں نے لکڑی کا مشکوک ڈبہ دیکھ کر معمر خاتون کو روکا تو سامان سے انسانی ہڈیاں برآمد ہوئیں۔

اہلکارو یہ دیکھ کر حیران رہ گئے کہ 54 سالہ بیٹی کے ساتھ سفر کرنے والی غیر ملکی بزرگ خاتون کے سامان میں انسانی ہڈیوں کا کیا کام ہوسکتا ہے؟

اہلکاروں نے واقعے کی اطلاع کسٹم حکام کو دی جس کے بعد ڈاکٹر، پبلک پراسیکیوٹر اور کسٹم اہلکار موقع پر پہنچے اور انسانی ہڈیوں کا جائزہ لیا۔مذکورہ خواتین نے حکام کو وہ دستاویزات دکھائیں، جن کے مطابق یہ جسمانی باقیات 74 سالہ خاتون کے شوہر کی تھیں جو 2008 میں انتقال کرگیا تھا۔

جرمن میڈیا کی رپورٹ کے مطابق اسے یونانی شہر سالونیکی کے نواح میں اس کی رہائش گاہ کے باغیچے میں دفنایا گیا تھا، اس آرمینیائی نژاد باشندے کی بیوہ اور بیٹی اس کی جسمانی باقیات لے کر آرمینیا جا رہی تھیں کہ انہیں اس کے آبائی وطن میں دفنایا جا سکے۔

مقامی میڈیا کا کہنا تھا کہ ابتدائی معائنے اور قانونی دستاویزات کی جانچ کے بعد پبلک پراسیکیوٹر نے کہا کہ مذکورہ خواتین کسی جرم کی مرتکب نہیںؓ ہوئیں اور نہ ہی واقعے کی مزید تفتیش کی ضرورت ہے۔

اس کارروائی کے بعد ایئر پورٹ حکام نے ان آرمینیائی نژاد ماں بیٹی کو لکڑی کے ڈبے میں بند انسانی باقیات کے ساتھ اپنا سفر جاری رکھنے کی اجازت دے دی۔

Leave a reply