اوچ شریف (باغی ٹی وی، نامہ نگار حبیب خان) اوچ شریف کے نواحی علاقے دھوڑکوٹ سرکاری بند پر درختوں کی بےدردی سے کٹائی جاری ہے۔ مقامی ہوٹل مالکان مبینہ طور پر ایندھن کے لیے بڑے پیمانے پر درخت کاٹ رہے ہیں، جس سے ماحولیاتی توازن اور سیلابی تحفظ دونوں کو خطرہ لاحق ہو گیا ہے۔
شہریوں نے اس عمل پر شدید تشویش کا اظہار کرتے ہوئے مطالبہ کیا ہے کہ اعلیٰ حکام فوری نوٹس لیں اور متعلقہ محکمے غیر قانونی درختوں کی کٹائی میں ملوث عناصر کے خلاف سخت کارروائی کریں۔ شہریوں کا کہنا ہے کہ یہ درخت بند کو مضبوط رکھنے اور ماحولیاتی آلودگی کے خلاف قدرتی ڈھال کا کردار ادا کرتے ہیں۔
ذرائع کے مطابق درختوں کی کٹائی کا سلسلہ کئی روز سے جاری ہے لیکن متعلقہ محکمہ خاموش تماشائی بنا ہوا ہے۔ ماہرین ماحولیات نے خبردار کیا ہے کہ اگر یہ سلسلہ نہ رکا تو علاقہ شدید ماحولیاتی خطرات کی زد میں آ سکتا ہے۔ شہریوں نے بند پر دوبارہ شجرکاری کر کے سرکاری اثاثے کی بحالی کا مطالبہ بھی کیا ہے۔
