ممتاز حیدر
اسلام آباد ہائی کورٹ نے بانی پاکستان تحریک انصاف (پی ٹی آئی) عمران خان اور ان کی اہلیہ بشریٰ بی بی کی توشہ خانہ ٹو کیس میں بریت کی درخواستوں پر جلد سماعت کرنے کا حکم دیا ہے۔ یہ فیصلہ عدالت کے جسٹس انعام امین منہاس کی سربراہی میں دیا گیا۔
اسلام آباد ہائی کورٹ کے جسٹس انعام امین منہاس نے کیس کی جلد سماعت کی درخواست منظور کی۔ وکیل خالد یوسف چوہدری کی جانب سے یہ استدعا کی گئی تھی کہ توشہ خانہ ٹو کیس کی سماعت کی تاریخ جلد مقرر کی جائے، جس پر عدالت نے فوری کارروائی کرتے ہوئے کیس کی سماعت کے لیے تاریخ مختص کرنے کا حکم دیا۔ جسٹس انعام امین منہاس نے اس موقع پر ریمارکس دیے کہ "میں نے آرڈر کر دیا ہے، آفس کیس سماعت کے لیے جلد مقرر کر دے گا۔”
یاد رہے کہ عمران خان اور بشریٰ بی بی نے توشہ خانہ ٹو کیس میں اپنی بریت کی درخواستیں دائر کر رکھی ہیں۔ ان درخواستوں میں انہوں نے عدالت سے استدعا کی ہے کہ انہیں توشہ خانہ میں مبینہ طور پر غیر قانونی خرید و فروخت کے الزامات سے بری کیا جائے۔
