کلیار شریف انڈیا ،حضرت خواجہ علاؤالدین احمد صابر ؒ کا عرس،شرکت کےلئے درخواستیں طلب

کلیار شریف انڈیا میں حضرت خواجہ علاؤالدین احمد صابر ؒ کے سالانہ عرس میں شرکت کےلئے درخواستیں طلب

وزارتِ مذہبی امور و بین المذاہب ہم آہنگی نے کلیار شریف انڈیا میں حضرت خواجہ علاؤالدین علی احمد صابر ؒ کے سالانہ عرس میں شرکت کے خواہشمند پاکستانی زائرین سے20مارچ، 2024تک زیارت فارم کے ذریعے درخواستیں طلب کر لی ہیں۔ درخواستوں کے ہمراہ وزارت کے نام ایک ہزار روپے (Rs.1000/-)کا ناقابلِ واپسی بینک ڈرافٹ کرنا لازم ہے۔ عرس کی تقریبات 14ستمبر تا 20 ستمبر 2024ء، کلیار شریف بھارت میں جاری رہیں گی۔ وزارت سے جاری بیان کے مطابق 200پاکستانی زائرین کوعرس میں شرکت کیلئےانڈیا بھجوایا جائے گا ۔

عرس کیلئے درخواستیں زیادہ موصول ہونے پر 15اپریل2024کو دن 11بجے وزارتِ مذہبی امور و بین المذاہب ہم آہنگی میں قرعہ اندازی کے ذریعے 200زائرین کا انتخاب کیا جائے گا۔عرس سے متعلق دیگر تفصیلات /ہدایات/ درخواست فارم وزارت کی ویب سائٹ اور فیس بک پیج پر دستیاب ہیں۔ وزارت پرانے فارم پر کوئی درخواست قبول نہ کرے گی۔عوام کی آگہی کیلئے یہ بھی تاکید کی جاتی ہے کہ تمام درخواستیں وزارت میں براہ راست بھجوائیں۔ وزارت نے کسی فرد/ادارے یا کمپنی کو خود سے درخواستیں جمع کرنے یا پراسس کرنے کی اجازت نہیں دی۔