ممتاز حیدر
بھارتی حملے میں شہید ہونے والے قاری عبدالمالک، خالد اور مدثر کی اجتماعی نماز جنازہ آج مریدکے میں ادا کی گئی، جس میں ہزاروں شہریوں کے علاوہ سول و عسکری حکام، مقامی رہنماؤں اور مرکزی مسلم لیگ کے ترجمان تابش قیوم نے بھی شرکت کی۔
نماز جنازہ معروف دینی رہنما حافظ عبدالرؤف نے پڑھائی، جس کے دوران شرکاء کی بڑی تعداد نے ملک کی سلامتی، شہداء کے درجات کی بلندی اور دشمن قوتوں کے خلاف فتح کی دعائیں مانگیں۔ نماز جنازہ کے موقع پر شرکاء پاکستان زندہ باد، شہداء پائندہ باد، اور بھارت مردہ باد کے فلک شگاف نعرے لگاتے رہے۔ شہر بھر میں جذباتی مناظر دیکھنے میں آئے، ہر آنکھ اشکبار تھی اور فضا سوگوار تھی،
ذرائع کے مطابق، قاری عبدالمالک، خالد اور مدثر مریدکے کی مرکزی مسجد سے وابستہ تھے، جہاں وہ بالترتیب امام، مؤذن اور خادم کے طور پر خدمات سرانجام دے رہے تھے۔ بھارتی حملے کے وقت تینوں افراد مسجد کے ساتھ والے کمرے میں سو رہے تھے کہ دشمن نے رات کی تاریکی میں میزائل حملہ کیا، جس میں مسجد مکمل طور پر شہید ہو گئی اور تینوں افراد موقع پر ہی شہید ہو گئے۔
شرکاء نے اس حملے کو بھارت کی بزدلانہ کارروائی قرار دیتے ہوئے کہا کہ "رات کے اندھیرے میں وار کرنے والے دشمن کو دن کے اجالے میں منہ توڑ جواب دیا جائے گا۔” شہریوں نے فوج اور حکومت سے بھرپور جوابی کارروائی کا مطالبہ کیا،شہداء کی میتیں نماز جنازہ کے بعد ان کے آبائی علاقوں کو روانہ کر دی گئیں جہاں ان کی تدفین سرکاری اعزاز کے ساتھ کی جائے گی۔
