بھارتی وزارت کامرس اینڈ ٹریڈ کا سارک چیمبرز آف کامرس کے موجودہ صدر کے خلاف تحفظات کا اظہار

بھارتی دفتر خارجہ کی طرف سے سارک یونیورسٹی کے قائم مقام صدر ڈاکٹر اے وی ایس رامیش چندرکے خلاف کئے جانے والے اقدامات کے بعد بھارتی وزارت کامرس اینڈ ٹریڈ کے بعض اعلی حکام نے سارک چیمبرز آف کامرس کے موجودہ صدر کے خلاف اپنے تحفظات کا اظہار کر دیا ہے۔ ایک بھارتی ٹی وی کے مطابق مذکورہ حکام کا کہنا ہے کہ سارک کے موجودہ صدر جن کا تعلق پاکستان سے ہے، ان پر الزام ہے کہ وہ سارک چیمبر اراکین کی الگ لابی قائم کر رہے ہیں جس سے پاکستان کی سارک چیمبر پر پوزیشن مضبوط ہو سکتی ہے۔ مزید یہ کہ موجودہ صدر بھارتی صنعتکاروں کے لئے کوئی کام نہیں کر رہے۔ بھارتی ٹی وی کے مطابق ان حکام نے ایک رپورٹ تیار کی ہے جو جلد ہی بھارتی وزیر کامرس اینڈ ٹریڈ پیوش گوئیل کو پیش کریں گے جو بعد میں دفتر خارجہ کے ذریعے پاکستانی حکام کو ارسال کی جائے گی۔ دریں اثنا بھارتی تاجروں کے ایک سرکردہ عہدیدار نے فون پر بات کرتے ہوئے اپنا نام ظاہر نہ کرنے کی شرط پر بتایا کہ بھارتی وزارت کامرس اینڈ ٹریڈ کے کئی افسران کو سارک چیمبر آف کامرس کی صدارت پاکستان کے پاس ہونا پسند نہیں جس کی وجہ سے وہ صدر کو تبدیل کروانے کی کوشش کر رہے ہیں۔ دریں اثنا اس سلسلے میں سارک کے موجودہ صدر سے رابطہ کرنے کی کوشش کی گئی تاہم ان سے رابطہ نہیں ہو سکا۔