ایران میں قتل کیے جانے والے پاکستانیوں کی فہرست جاری

اسلام آباد: ایران میں دہشتگردوں کے حملے میں جاں بحق ہونے والے پاکستانیوں کی فہرست جاری کردی گئی۔

ایران میں پاکستانی سفیر مدثر ٹیپو نے 2 روز قبل ایران میں دہشتگردوں کے حملے میں قتل کیے جانے والے 8 پاکستانی شہریوں کی فہرست جاری کردی۔

ایران میں پاکستانی سفیر مدثر ٹیپو کے مطابق بہاولپورکے 8 محنت کش پاکستانی ایران کے شہر مہرستان میں جاں بحق ہوئے،جاں بحق افراد میں محمد عامر، محمد دلشاد، محمد ناصر، ملک جمشید، محمد دانش، محمد نعیم، غلام جعفر اورمحمد خالد شامل ہیں،پاکستانی سفارت خانہ ایرانی حکام سے مکمل رابطے میں ہے اور جاں بحق پاکستانیوں کی میتیں وطن واپس لانے کے انتظامات مکمل کیے جارہے ہیں جب کہ وزیراعظم اور ڈپٹی وزیراعظم کی ہدایت پرمیتیں جلد وطن بھجوائی جائیں گی۔

پاکستانی سفیر نے بتایا کہ ایران سے پاکستانی شہریوں کی ہلاکت پر انصاف کے حصول کے لیے مکمل تعاون جاری ہے، ایرانی حکام سے فوری اور شفاف تحقیقات کےلیے رابطے میں ہیں، ایرانی حکومت نے مکمل تعاون کی یقین دہانی کرائی ہے۔

لاہور سمیت بہاولپور میں مقتولین کے ورثاء اپنے پیاروں کی میتوں کے منتظر ہیں جبکہ آبائی علاقوں میں تعزیت کے لیے عزیز و اقارب کی آمد کا سلسلہ جاری ہےلواحقین نے حکومت پاکستان سے مطالبہ کیا ہے کہ میتیں جلد از جلد وطن واپس لائی جائیں تاکہ ان کی تدفین کی جا سکے۔

واضح رہے کہ گزشتہ روز ایران کے صوبے سیستان میں دہشتگردوں نے ایک ورکشاپ پر فائرنگ کر کے 8 پاکستانی کار مکینکس کو قتل کردیا تھا، مقتولین کا تعلق پنجاب سے تھا۔