یوٹیوبر جمیل فاروقی کا دو روزہ جسمانی ریمانڈ منظور

0
45

اسلام آباد کی مقامی عدالت نے پولیس کی جانب سے یوٹیوبر جمیل فاروقی کے جسمانی ریمانڈ کی درخواست پر دو روزہ جسمانی ریمانڈ منظور کرلیا ہے

یوٹیوبر جمیل فاروقی کو جوڈیشل مجسٹریٹ میاں اظہر ندیم کی عدالت میں پیش کیا گیا۔ پولیس نے جمیل فاروقی کے مزید جسمانی ریمانڈ کی استدعا کی جس پر دو روزہ جسمانی ریمانڈ منظور ہوگیا جبکہ جمیل فاروقی کے وکیل نے انہیں مقدمے سے ڈسچارج کرنے کی درخواست کی۔

یوٹیوبر جمیل فاروقی نے عدالت میں بیان میں کہا کہ گرفتاری کے وقت میری گاڑی اور پرس چھین لیا گیا۔ سندھ اور اسلام آباد پولیس نے مجھے تشدد کا نشانہ بنایا۔
جمیل فاروقی کے وکیل نے جسمانی ریمانڈ کی مخالفت کرتے ہوئے کہا کہ جمیل فاروقی نے شہباز گل کی باتیں اپنی زبانی بول کر یوٹیوب پر پروگرام کر دیا۔پولیس کیا برآمدگی کرنا چاہتی ہے جو جسمانی ریمانڈ مانگا جا رہا ہے۔ عدالت نے جمیل فاروقی کے جسمانی ریمانڈ کی درخواست پر فیصلہ محفوظ کرلیا۔

واضح رہے کہ جوڈیشل مجسٹریٹ جنوبی نے اسلام آباد پولیس پر جھوٹے الزامات عائد کرنے والے یوٹیوبر جمیل فاروقی کو تین روزہ راہداری ریمانڈ پر اسلام آباد پولیس کے حوالے کردیا تھا.
یوٹیوبر و نجی ٹی وی کے اینکر محمد جمال الدین عرف جمیل فاروقی کو اسلام آباد کیپیٹل پولیس پر جھوٹے الزامات لگانے پر گرفتار کرکے کراچی سٹی کورٹ میں جوڈیشل مجسٹریٹ جنوبی کی عدالت کے روبرو پیش کیا گیا تھا.

جمیل فاروقی کو اسلام آباد پولیس کے تفتیشی افسر میاں شہباز نے عدالت میں پیش کیا اور عدالت کو بتایا تھا کہ محمد جمال الدین عرف جمیل فاروقی کیخلاف رمنا پولیس اسٹیشن میں مقدمہ درج ہوا ہے، ہمیں راہداری ریمانڈ دیا جائے تاکہ جمیل فاروقی کو متعلقہ عدالت میں پیش کیا جاسکے۔

تفتیشی افسر کی گزارش پر عدالت نے ملزم کو تین روزہ راہداری ریمانڈ پر اسلام آباد پولیس کے حوالے کرتے ہوئے ملزم کو 3 دن میں متعلقہ عدالت میں پیش کرنے کا حکم دیا تھا.
عدالت نے ریمارکس دیئے تھے کہ تفتیشی افسر محمد جمال الدین عرف جمیل فاروقی کے اہلخانہ کو انکی گرفتاری سے آگاہ کریں، ملزم نے کسی قسم کے تشدد کی کوئی شکایت نہیں کی.
پولیس کے جمیل فاروقی پر الزامات:
پولیس کے مطابق ملزم جمیل فاروقی نے اپنے وی لاگ میں اسلام آباد کیپیٹل پولیس پر ملزم شہباز شبیر گل پر جسمانی اور جنسی تشدد کرنے کا الزام عائد کیا تھا جس پر اسلام آباد کیپیٹل پولیس نے اشتعال انگیز، من گھڑت اور جھوٹے الزامات لگانے والوں کے خلاف کارروائی کا عندیہ دیا تھا۔
اس حوالے سے مجسٹریٹ ایمل خان کی طرف سے تھانہ رمنا اسلام آباد میں وی لاگر جمیل فاروقی کے خلاف ایف آئی آر درج کرا دی گئی تھی، مجسٹریٹ نے جمیل فاروقی کی طرف سے شہباز گل کے ساتھ جنسی زیادتی اور شدید ترین تشدد کرنے کا واقعہ بیان کرنے پر تھانے میں رپورٹ کی تھی.

Leave a reply