ممتاز حیدر
بھارتی حکومت کی جانب سے جنگی جنون کے بڑھتے ہوئے رجحان کی وجہ سے بھارتی مارکیٹوں میں بے چینی کی فضا برقرار ہے۔
رائٹرز کی رپورٹ کے مطابق، بھارت میں مسلسل بڑھتی ہوئی سیاسی کشیدگی اور جنگی اقدامات نے غیر ملکی سرمایہ کاروں کو بھارتی اسٹاک مارکیٹ میں تحفظات کا شکار کر دیا ہے، جس کے نتیجے میں بھارتی اقتصادیات کو اربوں ڈالرز کا نقصان اٹھانا پڑا ہے۔رپورٹ کے مطابق، بھارتی حکومت کی جنگی پالیسیوں کے جواب میں پاکستان کی جانب سے مزید جوابی اقدامات ممکن ہیں، جن کے نتیجے میں حالات کسی طویل اور مکمل جنگ کی صورت اختیار کر سکتے ہیں۔ اویناش گورکشکا، جو ایک معروف تجزیہ کار ہیں، نے کہا کہ بھارت کی جنگی حکمت عملی کے حوالے سے پاکستان کے جوابی اقدامات انتہائی اہم ہو سکتے ہیں اور ان اقدامات کا اثر نہ صرف دونوں ممالک بلکہ پورے خطے پر پڑ سکتا ہے۔
جمعرات کے روز بھارتی سٹاک مارکیٹ کے انڈیکسز میں تقریباً 0.5 فیصد کمی ہوئی، جس سے اس ہفتے مجموعی طور پر تقریباً 1.3 فیصد کی تنزلی واقع ہوئی۔ بھارتی اسٹاک مارکیٹ میں مجموعی طور پر 13 میں سے 12 بڑے شعبے تنزلی کا شکار ہوئے ہیں۔ اس کی وجہ سے سرمایہ کاروں کی جانب سے مزید محتاط رویہ اختیار کیا جا رہا ہے، اور غیر ملکی سرمایہ کاروں نے بھارتی اسٹاک مارکیٹ پر اپنی تشویش کا اظہار کیا ہے۔
پچھلے دو کاروباری دنوں میں بازار میں زبردست گراوٹ دیکھنے کو ملی، جس کی وجہ سے سرمایہ کاروں کو مجموعی طور پر تقریباً 7 لاکھ کروڑ روپے کا نقصان ہوا ہے،جمعہ کو نیشنل اسٹاک ایکسچینج (این ایس ای) کا نِفٹی انڈیکس 265.80 پوائنٹس یا 1.10 فیصد کی گراوٹ کے ساتھ 24,008 پر بند ہوا، جبکہ بمبئی اسٹاک ایکسچینج (بی ایس ای) کا سینسیکس بھی 880.34 پوائنٹس یا 1.10 فیصد کی کمی کے بعد 79,454.47 پر آ گیا۔ یہ مسلسل دوسرا دن تھا جب بازار میں گراوٹ دیکھی گئی۔ گزشتہ دو سیشنز میں سینسیکس میں مجموعی طور پر 1,292.31 پوائنٹس یا 1.60 فیصد کی کمی ہوئی ہے۔
غیر ملکی سرمایہ کاروں کا کہنا ہے کہ بھارتی حکومت کی جانب سے جنگی اقدامات اور خطے میں کشیدگی کے بڑھنے کے نتیجے میں بھارتی اسٹاک مارکیٹ کے لیے خطرات بڑھ گئے ہیں۔ سرمایہ کاروں کو بھارتی اقتصادیات کے مستقبل پر شدید تحفظات ہیں، اور وہ اس بات کو نظر انداز نہیں کر سکتے کہ جنگی جنون کی قیمت نہ صرف انسانی زندگیوں پر بلکہ بھارتی معیشت پر بھی سنگین اثرات مرتب کر سکتی ہے۔
