ورلڈ ہیڈر ایڈ

1000 کفن پوش، 313 مسلح نوجوان،جماعت اسلامی کا لائن آف کنٹرول عبور کرنے کا پروگرام 27 ستمبر تک مؤخر

جماعت اسلامی 27ستمبر کو مظفر آباد میں کشمیریوں سے یکجہتی کرے گی، وزیراعظم کی اپیل اور سراج الحق کی درخواست پر لائن آف کنٹرول عبور کرنے کا پروگرام مؤخر کر دیا گیا ہے

جماعت اسلامی آزاد جموں کشمیر کے امیر ڈاکٹر خالد محمود نے اعلان کیا ہے کہ جماعت اسلامی 27ستمبر کو مظفرآباد میں پوری قوم کو جمع کر کے مقبوضہ کشمیر کے بھائیوں سے اظہار یکجہتی کرے گی،حکومت پاکستان سفارتی،سیاسی اور اخلاقی حمایت سے آگے بڑھ کر عملی اقدامات کرے،او آئی سی کا سربراہی اجلاس اسلام آباد میں بلا کر کشمیر کی آزادی کا روڈ میپ دیا جائے ،آزادکشمیر کے عوام 1947ءکی طرح اپنا کردار ادا کرنے کے لیے بے تاب ہیں،

27ستمبر کو وزیر اعظم آزادکشمیر راجہ فاروق حیدر خان سمیت پوری کشمیری قیادت کو دعوت دیں گے،سینیٹر سراج الحق خصوصی خطاب کریں گے 27 ستمبر کو جب وزیراعظم پاکستان عمران خان جنرل اسمبلی سے خطاب کریں گے آزاد کشمیر کے دارالحکومت مظفر آباد میں عظیم الشان کشمیر ریلی منعقد کی جائےگی جس میں آزاد کشمیر کے وزیر اعظم راجہ فاروق حیدر سمیت آزاد کشمیر کی تمام قیادت اور حریت کانفرنس کو بھی مدعو کیا جائےگا۔مظفر آباد کی ریلی میں مقبوضہ کشمیر کے بھائیوں کی عملی مدد کے لیے نئے لائحہ عمل کا اعلان کیا جائے گا۔

باغی ٹی وی کی رپورٹ کے مطابق ان خیالات کا اظہار انہوں نے اتوار کے روز نیشنل پریس کلب اسلام آباد میںپریس کانفرنسسے خطاب کرتے ہوئے کیا،اس موقع پر نائب امراءنورالباری،ارشد ندیم ،راجہ جہانگیر خان،سیکرٹری جنرل راجہ فاضل تبسم،جے آئی یوتھ کے صدر نثار احمد شائق سمیت دیگر قائدین ہمراہ تھے۔ ڈاکٹر خالد محمود نے بتایا کہ امیر جماعت اسلامی سینیٹر سراج الحق کی درخواست پرجماعت اسلامی یوتھ نے 21 ستمبر کا پروگرام موخر کر دیا ہے۔جماعت اسلامی یوتھ کے تحت بڑی تعداد میں نوجوان لائن آف کنٹرول کی جانب سے جانا چاہتے ہیں ان کے صبر کا پیمانہ لبریز ہو چکا ہے حکومت پاکستان کو ہی کوئی اقدام کرنا ہوگا۔

ڈاکٹر خالد محمود نے بتایا کہ وزیراعظم پاکستا ن کو دورہ مظفر آباد کے موقع پر اس صورتحال کا ادراک ہوا۔وزیراعظم نے 27 ستمبر تک روکنے کو کہا ہے چنانچہ وزیراعظم کے اعلان اور سراج الحق کی ہدایت پر جماعت اسلامی یوتھ نے اپنا پروگرام موخر کیا ہے 27 ستمبر کو کوئی اقدام نہ ہوا تو سیاسی جماعتوں کے اجلاس میں نیا لائحہ عمل طے کیا جائے گا۔

جماعت اسلامی یوتھ آزاد کشمیر کے سربراہ نثار احمد شائق نے اس موقع پر کہا کہ آزاد کشمیر کے ہزاروں نوجوانوں نے 21 ستمبر کو لائن آف کنٹرول کی طرف بڑھنے کا فیصلہ کیا تھا جماعت اسلامی کے امیر سراج الحق کی ہدایت پر اس پروگرام کو فی الحال موخر کیا جا رہا ہے۔انہوں نے کہا کہ تقریباً پچاس ہزار نوجوان تیار تھے ایک ہزار کفن پوش اور 313 مسلح نوجوان 21 ستمبر کے پروگرام کے لیے تیار تھے۔انجمن تاجران ،ٹرانسپورٹرزہمارے ساتھ تھے۔ہمارا اندازہ تھا کہ نوجوان اس قدر جذباتی ہیں کہ یہ تعداد ایک لاکھ سے بڑھ جائے گی۔انہوں نے کہا کہ ہم سیاسی جماعتوں کے فیصلے کا انتظار کریںگے۔

جواب چھوڑیں

آپ کا ای میل ایڈریس شائع نہیں کیا جائے گا.