کراچی میں صبح سویرے بارش سے سردی بڑھ گئی

کراچی کے مختلف علاقوں میں صبح سویرے بارش ہوئی جس سے شہر میں سردی بڑھ گئی،ملک کے بالائی علاقوں میں برفباری کا سلسلہ جاری ہے۔

باغی ٹی وی : آئی آئی چندریگر روڈ، صدر، لیاقت آباد سمیت دیگر علاقوں میں بارش ہوئی جس کے بعد پہلے سے سرد موسم میں مزید تیزی آگئی،محکمہ موسمیات کے مطابق شہر کا موسم آج ابر آلود رہے گا،پیر کی شام بھی سپر ہوئی وے نوری آباد،کاٹھور اور ملحقہ علاقوں میں بارش ہو ئی تھی جبکہ ملک کے بیشتر علاقوں میں آج موسم سرد اور بالائی اضلاع میں مطلع ابر آلود رہے گا۔

دوسری جانب ملک کے بالائی علاقوں میں بھی برف باری کا سلسلہ جاری ہے، مالم جبہ میں ایک فٹ برف پڑی، کالام ،استور مری، مظفر آباد میں بھی ہرطرف برف کی سفیدی دکھائی دے رہی ہے بالائی علاقوں میں برفباری سے راستوں کی بندش کا خدشہ ہے،گلگت بلتستان، بالائی خیبر پختونخوا، خطہ پوٹھوہار، کشمیر، ملحقہ پہاڑی علاقوں میں بارش اور پہاڑوں پر برفباری کا امکان ہے۔