کراچی میں انتہائی دلخراش واقعہ

کراچی : کراچی میں انتہائی دلخراش واقعہ

ڈکیتی کی واردات کے دوران نوجوان کو ماں اور بہن کے سامنے قتل کر دیا گیا، نوجوان کی ایک روز پہلے ہی شادی ہوئی تھی۔

تفصیلات کے مطابق بدھ کے روز کراچی کے علاقے کشمیر روڈ پر انتہائی افسوسناک واقعہ پیش آیا۔ میڈیا رپورٹس کے مطابق ڈکیتی کی واردات کے دوران ایک روز قبل شادی کرنے والے نوجوان کو قتل کر دیا گیا۔

بتایا گیا ہے کہ کشمیر روڈ پر واقع ایک گھر کے باہر موجود 2 خواتین کو ایک ڈاکو نے پستول دکھا کر لوٹنے کی کوشش کی۔ اسی دوران گھر کے اندر سے ایک نوجوان باہر نکلا اور فوری ڈاکو پر جھپٹ پڑا۔ اس دوران ڈکیت نے نوجوان پر گولیاں چلا دیں اور خواتین کو لوٹ کر فرار ہو گیا۔ پولیس کے مطابق نوجوان کی ایک روز قبل ہی شادی ہوئی تھی، جبکہ جن خواتین کے سامنے اس کا قتل ہوا، وہ مقتول کی والدہ اور بہن ہیں۔

پولیس کے مطابق قاتل کی تلاش جاری ہے۔ کراچی میں ہی ڈکیتی کی ایک اور واردات کے دوران نوجوان لڑکی کو زخمی کر دیا گیا۔ زمان ٹاؤن تھانے کے علاقے کورنگی کراسنگ بھٹائی آباد سیکٹر ایف میں واقع شمیم مسجد کے قریب ڈکیتی کی واردات کے دوران مزاحمت پر موٹر سائیکل پرسوار دو نامعلوم ملزمان نے مزاحمت پر فائرنگ کر کے 20 سالہ لڑکی کو زخمی کردیا اور فرار ہوگئے۔ واقعہ کی اطلاع ملنے پر پولیس نے موقع پر پہنچ کر زخمی لڑکی کو طبی امداد کے لئے جناح اسپتال منتقل کیا ۔