کراچی(باغی ٹی وی) واٹر ٹینکر کی ٹکر سے حاملہ خاتون، شوہر اور نومولود جاں بحق
کراچی کے علاقے ملیر ہالٹ کے قریب تیز رفتار واٹر ٹینکر کی موٹر سائیکل کو ٹکر سے حاملہ خاتون شوہر سمیت جاں بحق، جنم لینے والا نومولود بھی دم توڑ گیا۔
ریسکیو ذرائع کے مطابق یہ افسوس ناک واقعہ ملیر ہالٹ کے قریب پیش آیا جہاں واٹر ٹینکر نے موٹرسائیکل سوار میاں بیوی کو کچل دیا۔
پولیس کے مطابق خاتون حاملہ تھی، جو زخمی حالت میں بچے کو جنم دینے کے فوراً بعد چل بسی جبکہ نومولود بھی جانبر نہ ہو سکا۔
پولیس نے حادثے کا ذمہ دار واٹر ٹینکر ڈرائیور کو گرفتار کر کے ٹینکر تحویل میں لے لیا ہے۔ ابتدائی تفتیش کے مطابق حادثہ ممکنہ طور پر بریک فیل ہونے کے باعث پیش آیا۔
پولیس کا کہنا ہے کہ واٹر ٹینکر ہائی وے کی جانب سے آرہا تھا اور ملیر ہالٹ پل کے نیچے تیزی سے شارع فیصل کی طرف بڑھا، جس کے نتیجے میں موٹر سائیکل سوار میاں بیوی حادثے کا شکار ہو گئے۔
