کراچی سے ٹینکر مافیا کی چھٹی، اکتوبر دوہزار تئیس سے روشنیوں کے شہر کو اضافی پانی دینے کا منصوبہ تیار

کراچی کے شہریوں کیلئے پینے کے صاف پانی کی فراہمی کے بڑے منصوبے کے فور کی ڈیزائن کنسلٹنٹسی کا معاہدہ آسٹرین کمپنی سے طے پا گیا ہے۔

وزیر مملکت برائے اطلاعات فرخ حبیب کہتے ہیں کہ کراچی سے ٹینکر مافیا کی چھٹی کا آغاز کر دیا اکتوبر دوہزار تئیس سے روشنیوں کے شہر کو چھ سو پچاس ملین گیلن یومیہ پانی ملے گا۔

اسلام آباد میں واپڈا اور آسڑین کمپنی آئی ایل ایف کے درمیان کے فور منصوبے کی کنسلٹنسی کے ایک ارب چودہ کروڑ روپے کے معاہدے پر دستخط ہوئے ۔ تقریب کے بعد وزیر مملکت برائے اطلاعات فرخ حبیب کا کہنا تھا کہ کراچی پیکیج پر عمل درآمد کا آغاز ہو چکا ہے۔ دو سال میں منصوبہ مکمل کرلیا جائے گا۔

چیئرمین واپڈا لیفٹیننٹ جنرل ریٹائرڈ مزمل حسین کے مطابق کے فور منصوبے کی تاخیر کی بنیادی وجہ سروے اور الائنمنٹ کی تھی۔منصوبے کی اصل لاگت کا تعین کنسلٹنسی رپورٹ کرے گی۔ چیئرمین واپڈا کے مطابق راستے کے حصول اور فنڈز میں رکاوٹ نہ ہوئی تو منصوبے کو ستمبر دوہزار تئیس تک مکمل کر لیں گے.