fbpx

کشمیریوں سے اظہار یکجہتی: گورنمنٹ کالج میاں چنوں کے طلبا نے ریلی کا اہتمام کیا

میاں چنوں: کشمیریوں سے اظہار یکجہتی کے لیے گورنمنٹ کالج میاں چنوں کے طلبا نے ریلی کا اہتمام کیا۔ جس میں گورنمنٹ ڈگری کالج میاں چنوں کے پرنسپل ڈاکٹر طارق محمود ودیگر اساتذہ نے خصوصی شرکت کی۔

تفصیلات کے مطابق ریلی ڈگری کالج سے شروع ہو کر ٹی چوک پر اختتام پذیر ہوئی۔ اس موقع پر طلبا کی کثیر تعداد ریلی میں شریک ہوئی۔ کشمیریوں سے اظہار یکجہتی کے لیے طلبا نے بینرز اور پلے کارڈز اٹھا رکھے تھے جن پر کشمیرکی آزادی اور بھارت کے خلاف نعرے درج تھے۔ طلبا نے کشمیریوں سے اظہار یکجہتی کرتے ہوئے نعرے بھی بلند کئے۔

اس موقع پرطلبا سے گفتگو کرتے ہوئے گورنمنٹ ڈگری کالج میاں چنوں کے پرنسپل ڈاکٹر طارق محمود نے کہا کہ اب کشمیر کی آزادی دور نہیں۔ مودی نے آرٹیکل 370 کو ختم کر کے اپنے ہی آئین کی خلاف ورزی کا مرتکب ہوا ہے۔ کشمیر میں 26روز سے کرفیو عائد ہے۔ لوگوں اپنے گھروں میں محصور ہیں۔ اشیائے خوردونوش اور ادویات کی شدید قلت ہے۔ میڈیا اور مواصلاتی نظام مکمل بند کر کے کشمیر کو دنیا سے الگ کر رکھا ہے۔

کشمیریوں کی نسل کشی کے لیے آر ایس ایس کے غنڈوں کو وادی میں پہنچایا جا رہا ہے۔چند ہی دنوں میں ہزاروں بے گناہ کشمیریوں کو گرفتار کیا جا چکا ہے۔ سینکڑوں افراد پیلٹ گن کا شکار ہو چکے ہیں۔

عالمی برادری بھارت کی غنڈہ گردی اور دہشتگردی کے خلاف اقدامات کرنے سے قاصر ہے۔ انھوں نے مزید کہا کہ کشمیر کی منزل اب دور نہیں۔ اب بہت جلد کشمیر ہندو بنیا سے آزاد ہو کر پاکستان بنے گا۔ ہمیں چاہیے کہ ہم عالمی سطح پر کشمیر کے مقدمے کو اٹھائے اور کشمیریوں کی آزادی کے لیے اپنا کردار بھی ادا کریں۔