دریائے چناب سے ملحقہ علاقے میں کٹاؤ کا سروے جلد مکمل کرنے کی ہدایت

گجرات(نمائندہ باغی ٹی وی)ایڈیشنل ڈپٹی کمشنر ریونیوڈاکٹر حفصہ کنول نے ہدایت کی ہے کہ دریائے چناب سے ملحقہ کٹاؤ سے متاثرہ علاقوں کا سروے کرکے تفصیلی رپورٹ پیش کی جائے، محکمہ انہار کٹاؤ کی روک تھام، آبادیوں اور زرعی اراضی کو محفوظ بنانے کیلئے جامع منصوبہ تیار کرے، بلدیاتی ادارے اربن فلڈنگ سے بچاؤ کیلئے تمام سیوریج نالوں کی صفائی کا کام ہنگامی بنیادوں پر مکمل کریں، ان خیالات کا اظہار انہوں نے ڈسٹرکٹ ڈیزاسٹر مینجمنٹ کمیٹی کے اجلاس سے خطاب کرتے ہوئے کیا، اسسٹنٹ کمشنر فیصل عباس مانگٹ، سی ای اوز محمد افضل شاہد، ڈاکٹر زاہد تنویر، ایگزیکٹو انجینئرز رائے محمد نواز، عبدالوحید، ڈپٹی ڈائریکٹر سوشل ویلفیئر محمد ارشد، ڈپٹی ڈائریکٹر زراعت توسیع ڈاکٹر عرفان اللہ وڑائچ سمیت مختلف محکموں کے ضلعی سربراہان نے شرکت کی۔ ایڈیشنل ڈپٹی کمشنر ریونیو نے ہدایت کی کہ اسسٹنٹ کمشنر سرائے عالمگیر اور زراعت ڈیپارٹمنٹ کے افسران دریائے جہلم سے ملحقہ علاقہ جات کا تفصیلی سروے کرائیں اور اگر گزشتہ دنوں دریا سے گزرنے والے سیلابی ریلے سے کسی قسم کے نقصانات ہوئے ہیں تو اس بارے رپورٹ پیش کی جائے، محکمہ انہار کے افسران اور اسسٹنٹ کمشنرز دریائے چناب کے حفاظتی پشتہ جات کا معائنہ کریں، ڈنگہ کے قریب نہر اپر جہلم کے پشتوں، ککرالی کے قریب نالہ بھمبر کے کٹاؤ سے متاثرہ علاقوں کا بھی معائنہ کیا جائے۔ انہوں نے ہدایت کی کہ چیف ایگزیکٹوآفیسر ز ہیلتھ و ایجوکیشن ممکنہ سیلاب یا کٹاؤ کا شکار علاقوں میں سکولوں اور ہسپتالوں کا سروے کرائیں اور ایسے اداروں کی تفصیلات فراہم کی جائیں جنہیں خطرہ ہو سکتا ہے تاکہ انہیں محفوظ بنانے کیلئے فوری اقدامات کئے جاسکیں۔ اے ڈی سی ریونیو نے کہا گجرات میں بیشتر بڑے سیوریج نالوں کی صفائی کی جاچکی ہے، کھاریاں میں مین سیوریج نالے کی طویل عرصے بعد ڈی سلٹنگ کی گئی ہے، دیگر میونسپل کمیٹیاں بھی ڈی سلٹنگ کا عمل جاری رکھے ہوئے ہیں،افسران تمام کام کی خود نگرانی کریں۔ انہوں نے کہا کہ ممکنہ سیلاب کی صورتحال پر نظر رکھنے کیلئے کنٹرول روم فعال کیا جاچکا ہے، محکمہ صحت، لائیو سٹاک ڈیپارٹمنٹ بھی الرٹ رہیں۔ اس سے قبل تمام محکموں کے سربراہان نے فلڈ ریلیف کے بارے میں پلان بارے بریفنگ دی۔

جواب چھوڑیں

آپ کا ای میل ایڈریس شائع نہیں کیا جائے گا.