ڈاکٹرغلام مصطفی بڈانی
میرپور ماتھیلو (باغی ٹی وی، نامہ نگار مشتاق لغاری)خیرپور کے علاقے ببرلو میں جاری دھرنے کے حوالے سے وزیر اعظم کے مشیر برائے امور داخلہ رانا ثناء اللہ نے دھرنے کے قائدین سے ٹیلیفونک رابطہ کیا ہے۔ یہ رابطہ مسلم لیگ (ن) سندھ کے صدر بشیر میمن کے ذریعے قائم کیا گیا، جس میں رانا ثناء اللہ نے ہائی کورٹ کراچی بار کے صدر بریسٹر سرفراز میتلو سے گفتگو کی۔
رانا ثناء اللہ نے دھرنے کے خاتمے کی اپیل کرتے ہوئے کہا کہ "معاملات بیٹھ کر حل کیے جا سکتے ہیں، دھرنے کے باعث نہ صرف مسافر پریشان ہیں بلکہ ملکی معیشت کو بھی نقصان پہنچ رہا ہے۔” انہوں نے مزید کہا کہ وفاقی حکومت مسائل کے حل کے لیے سنجیدہ ہے اور بات چیت کے ذریعے آگے بڑھنا چاہتی ہے۔
دوسری جانب بریسٹر سرفراز میتلو نے مؤقف اختیار کیا کہ "ہم اپنے موقف پر قائم ہیں لیکن ڈائیلاگ کے دروازے بند نہیں کیے۔ جب تک کینال منصوبے کی منسوخی کا باضابطہ نوٹیفکیشن جاری نہیں ہوتا، دھرنا ختم نہیں کیا جائے گا۔”
بریسٹر سرفراز کے مطابق وفاقی حکومت نے بشیر میمن کے ذریعے دھرنا قائدین سے باضابطہ رابطہ کیا ہے اور آج اس حوالے سے اہم اجلاس بلایا گیا ہے جس میں آئندہ کا لائحہ عمل طے کیا جائے گا۔
