fbpx

محکمہ لیبر کا خواتین فیکٹری ورکرز کو اسکوٹی موٹر سائیکلیں دینے کا اعلان

لاہور: پنجاب میں خواتین فیکٹری ملازمین کو محکمہ لیبر اسکوٹی موٹر سائیکلیں دے گا۔

باغی ٹی وی :نجی خبررساں ادارے کے مطابق سیکرٹری لیبر لیاقت علی چٹھہ نے گورننگ باڈی کے اجلاس کی صدارت کی جس میں ڈی جی لیبر فیصل ظہور،ڈپٹی سیکرٹری راؤ زاہد سمیت دیگر ممبران نے شرکت کی۔

سیکرٹری لیبر کے مطابق اجلاس میں سالانہ 100 خواتین فیکٹری ورکرز کو اسکوٹی موٹر سائیکلیں فراہم کرنے کی منظوری دی گئی ہے اجلاس میں ورکرز ویلفیئر اسکولوں میں اساتذہ کی 304 خالی اسامیوں پر بھرتی کا فیصلہ بھی کیا گیا اور کمپیوٹر ٹیچرز کی 8 نئی اسامیوں کی منظوری دی گئی۔

سیکرٹری لیبر لیاقت علی نے تمام طلباء کو اسکول یونیفارم کی مد میں گرانٹ فوری ادا کرنے کا حکم دیا اور گورننگ باڈی نے 70 ملین روپے کی لاگت سے ویلفیئر اسکولوں کیلئے فرنیچر خریدنے اور ٹیوٹا کے تعلیمی اداروں میں مزدوروں کے بچوں کو تکنیکی تعلیم مہیا کرنے کی منظوری بھی دی محکمہ لیبر ٹیوٹا کے اداروں میں تعلیم حاصل کرنے والے بچوں کی فیس ادا کرے گا۔

سیکرٹری لیبر نے کہا کہ گوجرانوالہ میں جعلی کاغذات کی مدد سے ڈیتھ گرانٹ کے لئے 10 کیسز دائر کئے گئے، جس پر محکمہ کے 3 ملازمین اور 2 لیبر لیڈرز کے خلاف گرانٹ کی جعلی کیسز پر ایف ائی آر درج کروائی گئی ہے۔