روزنامہ جنگ اور دی نیوز میں تنخواہوں میں تاخیر پر کے یو جے کا اظہار تشویش

0
33

کراچی :شہرقائد میں یونین آف جرنلسٹس نے جنگ گروپ میں تنخواہوں کی ادائیگی میں ایک دفعہ پھر تاخیر پر تشویش کا اظہار کیا ہے اور جنگ گروپ کی انتظامیہ سے مطالبہ کیا ہے کہ وہ فوری طور پر تنخواہوں کی ادائیگی کو یقینی بنائیں۔ کے یو جے کے صدر شاہد اقبال اور جنرل سیکریٹری فہیم صدیقی سمیت مجلس عاملہ کے تمام اراکین کی جانب سے جاری ایک بیان میں کہا گیا ہے کہ جنگ گروپ اس وقت ملک میں سب سے ریونیو کمانے والا میڈیا ہاوس ہے جس کے چینل اور اخبارات کی ماہانہ آمدنی ایک ارب روپے سے زیادہ ہے لیکن اس کے باوجود روزنامہ جنگ اور دی نیوز میں ملازمین کو تنخواہیں وقت پر ادا نہیں کی جارہیں۔

بیان میں کہا گیا ہے کہ مہنگائی کے اس دور میں روزنامہ جنگ اور دی نیوز میں تنخواہوں کی ادائیگی میں تاخیر کسی بھی طرح قابل قبول نہیں ہے۔ جنگ کی انتظامیہ کو اس بات کا خیال ہونا چاہیے کہ آج اگر جنگ گروپ ملک کا سب سے بڑا میڈیا ہاوس ہے تو یہ جنگ اور دی نیوز کے کارکنوں کی انتھک محنت سے ہی ممکن ہوا ہے ایک اخبار سے دو اخبار اور دو سے کئی اخبارات اور پھر چینلز تک کا سفر جس زیرو سے شروع ہوا ہے اسے نظرانداز کرنا ایک غلط عمل ہے۔

بیان میں کہا گیا ہے کہ جنگ گروپ نے خسارے کا دعوی کرکے 2018 میں یک جنبش قلم کئی سو ملازمین کو ملازمتوں سے فارغ کیا لیکن آج میڈیا انڈسٹری کے حالات 2018 کے مقابلے میں بہت بہتر ہیں لیکن اس کے باوجود جنگ گروپ کی انتظامیہ کی ۔جانب سے ملازمین کو کئی کئی ماہ تک تنخواہوں سے محروم رکھنا ظلم اور زیادتی کے مترادف ہے۔ ایک طرف کئی سالوں سے ملازمین کی تنخواہوں میں کوئی اضافہ نہیں کیا گیا ہے اور دوسری طرف مہنگائی کے اس دور میں ان کی رہی سہی تنخواہ بھی وقت پر ادا نہیں کی جارہی۔

بیان میں کہا گیا ہے کہ ملازمین کو وقت پر تنخواہیں ادا نہ کرنا ملکی قوانین کی خلاف ورزی ہے اور جنگ گروپ ہی نہیں دیگر میڈیا ہاوس بھی یہ جرم کررہے ہیں کے یو جے نے چیف جسٹس آف پاکستان سے اپیل کی ہے کہ وہ اس صورتحال کا نوٹس لیں اور جنگ گروپ سمیت تمام میڈیا ہاوسز کو ملازمین کی تنخواہیں وقت پر ادا کرنے کا پابند کریں۔

Leave a reply