ممتاز حیدر
پاکستان آرمی کے آپریشن بنیان المرصوص کی شاندار کامیابی پر مرکزی مسلم لیگ کے زیر اہتمام لاہور میں عظیم الشان فتح ریلی نکالی گئی، جس میں عوام، سول سوسائٹی، تاجر برادری اور پارٹی کارکنان نے بھرپور شرکت کی۔ ریلی کی قیادت مرکزی مسلم لیگ پنجاب کے صدر چوہدری محمد سرور نے کی جبکہ مرکزی جنرل سیکرٹری ڈاکٹر مزمل ہاشمی، مرکزی رہنما چوہدری شفیق الرحمن وڑائچ، ڈپٹی جنرل سیکرٹری انجنئیر حارث ڈار، لاہور کے صدر انجنئیر عادل خلیق اور تاجر رہنما انعام بادشاہ بھی شریک ہوئے۔
ریلی کا آغاز مال روڈ استنبول چوک سے ہوا جو پنجاب اسمبلی کے سامنے اختتام پذیر ہوئی۔ شرکاء نے پاکستانی پرچم تھام رکھے تھے اور افواجِ پاکستان کے حق میں پرجوش نعرے بازی کی۔ ریلی میں علی عمران شاہین، عمر بادشاہ، ہال روڈ کے تاجر رہنما اور سول سوسائٹی کے نمائندگان بھی شریک تھے۔اس موقع پر چوہدری محمد سرور نے کہا کہ پوری قوم اپنی افواج کے شانہ بشانہ کھڑی ہے اور مسلح افواج نے دشمن کے ناپاک عزائم خاک میں ملا دیے ہیں۔ جنرل سیکرٹری لاہور ڈاکٹر مزمل ہاشمی نے خطاب کرتے ہوئے کہا کہ "آج کا دن پاکستان کی تاریخ کا یادگار لمحہ ہے، جو دشمن کی شکست اور ہماری افواج کی فتح کا دن ہے۔ پاکستانی قوم کو اس کامیابی پر سجدۂ شکر ادا کرنا چاہیے۔”
انجنئیر حارث ڈار نے کہا کہ افواج پاکستان مادرِ وطن کے دفاع کی مکمل صلاحیت رکھتی ہے جبکہ انجنئیر عادل خلیق نے اسے "یومِ فتح” قرار دیتے ہوئے قوم کو مبارکباد پیش کی۔ریلی کے دوران بھارت اور اسرائیل کے پرچم نذر آتش کیے گئے اور شرکاء نے ملی یکجہتی اور قومی اتحاد کا بھرپور مظاہرہ کیا۔ ڈاکٹر مزمل ہاشمی نے مزید کہا کہ "آج کا دن ثابت کرتا ہے کہ مودی کا جنگی جنون دریائے راوی میں بہا دیا گیا ہے۔ریلی نے زندہ دلانِ لاہور کی قومی حمیت اور افواجِ پاکستان سے والہانہ محبت کا عملی ثبوت پیش کیا۔
