fbpx

ٹھٹھہ : مسافر پرندوں کا شکار اور فروخت کرنے والوں کے خلاف سخت قانونی کارروائی کی جائے۔غضنفر علی قادری

باغی ٹی وی،ٹھٹھہ(نامہ نگار راجہ قریشی )مسافر پرندوں کا شکار اور فروخت کرنے والوں کے خلاف سخت قانونی کارروائی کی جائے۔غضنفر علی قادری
تفصیل کے مطابق ڈپٹی کمشنر ٹھٹھہ غضنفر علی قادری نے محکمہ وائلڈ لائف، پولیس اور ریونیو افسران کو ہدایت کی ہے کہ مقامی اور نقل مکانی کرنے والے پرندوں کے شکار اور فروخت کرنے والوں کے خلاف سخت قانونی کارروائی کی جائے۔ انہوں نے کہا کہ پرندوں کے غیر قانونی شکار کے خلاف قانون پر عملرآمد کو یقینی بنایا جائے بصورت دیگر کوتاہی اور غفلت کرنے والے افسران کے خلاف سخت کارروائی عمل میں لائی جائے گی۔ ان باتوں کا اظہار انہوں نے اپنے دفتر میں وائلڈ لائف، پولیس اور ریونیو افسران سے بجرت کرکے آنے والے پرندوں کے غیر قانونی شکار کے متعلق منعقدہ اجلاس کی صدارت کرتے ہوئے کیا۔ اس موقع پر ایڈیشنل ڈپٹی کمشنر ون ریاض حسین لغاری، ڈپٹی سینکچری وارڈن وائلڈ لائف رشید احمد، ڈسٹرکٹ انفارمیشن آفیسر محفوظ علی سومرو، مختیارکار ٹھٹھہ اقتدار حسین بہرانی، ڈی آئی بی انچارج اے ڈی شیخ، پی ایس ٹو ڈپٹی کمشنر سید ریاض شاہ و دیگر متعلقہ افسران موجود تھے۔ اس موقع پر ڈپٹی کمشنر نے کہا کہ سردی کی موسم شروع ہوتے ہی پرندوں کی آمد شروع ہو گئی ہے اس ضمن میں ایک ایسی حکمت عملی تشکیل دی جائے تاکہ ان کے تحفظ کو یقینی بنایا جا سکے۔ انہوں نے تمام افسران کو ہدایت کی کہ مختلف مقامات پر پرندوں کے شکار کیلئے نصب کئے گئے جال ضبط کئے جائیں اور ملوث افراد کو گرفتار کرکے ان کے خلاف جرمانہ عائد کرنے سمیت سخت قانونی کارروائی عمل میں لائی جائے تاکہ مقامی و آبی پرندوں کے شکار پر عائد پابندی کے قانون پر عملدرآمد کو یقینی بنایا جا سکے۔ انہوں نے محکمہ وائلڈ لائف کے افسران کو ہدایت کی کہ ضلع بھر کے مختلف شہروں اور علاقوں کا دورہ کرکے غیر قانونی طور پر پرندوں کا شکار اور فروخت کرنے والوں کی اطلاع اسسٹنٹ کمشنر، مختیاکار اور متعلقہ تھانوں کے ایس ایچ اوز کی دی جائے تاکہ ان کے خلاف کارروائی کی جا سکے۔