fbpx

لوگوں کو تکلیف دینا ن لیگ کا پسندیدہ مشغلہ ہے،چودھری پرویزالٰہی

چودھری شجاعت حسین اور پرویزالٰہی سے چودھری نذیر احمد جٹ اور ان کی صاحبزادی عارفہ نذیرجٹ کی ملاقات

پاکستان مسلم لیگ کے صدر و سابق وزیراعظم چودھری شجاعت حسین اور سپیکر پنجاب اسمبلی چودھری پرویزالٰہی سے سابق ایم این اے چودھری نذیر احمد جٹ اور ان کی صاحبزادی عارفہ نذیرجٹ نے ان کی رہائش گاہ پر ملاقات کی۔

چودھری حفیظ ہیئر، ڈاکٹر سرفراز احمد وڑائچ، چودھری صباحت الٰہی اور رانا خالد بھی ملاقات میں موجود تھے۔ ملاقات میں وہاڑی میں ضمنی انتخابات کے حوالے سے گفتگو کی گئی۔

چودھری پرویزالٰہی نے کہا کہ لوگوں کو تکلیف دینا ن لیگ کا پسندیدہ مشغلہ ہے، ان کو پتہ ہونا چاہئے کہ چار ماہ کے دوران انہوں نے عوام کو ریلیف نہیں صرف تکلیف دی ہے، حکمران عوام کو ریلیف دینے میں ناکام رہے، صرف مہنگائی اور ٹیکسوں کی بھرمار ان کا کارنامہ ہے۔

انہوں نے کہا کہ ان جعلی حکمرانوں کا ایجنڈا صرف ذاتی کیسوں کا خاتمہ ہے، مہنگائی کا طوفان برپا کرنے والوں کو عوام ووٹ کی طاقت سے سبق سکھائیں گے، ضمنی انتخابات میں تحریک انصاف کے امیدواروں کی برتری واضح ہے، عوام 17 جولائی کو ان جعلی حکمرانوں کے خلاف ووٹ کیلئے نکلیں گے.

چودھری پرویزالٰہی نے مزید کہا کہ ضمنی انتخابات میں عوام حکمرانوں سے مہنگائی کا حساب لیں گے۔ عوام اور کارکن دھاندلی کے ہر منصوبے کو روکنے کیلئے پولنگ اسٹیشنوں پر اپنے ووٹ کا پہرہ دیں گے۔