میری آنکھیں میرا سب سے طاقتور اور خطرناک ہتھیار ہیں کیارا اڈوانی

بالی وڈ کی معروف اداکارہ کیارا اڈوانی کے مطابق ان کا سب سے طاقتور اور خطرناک ہتھیار ان کی آنکھیں ہیں-

باغی ٹی وی: 28 سالہ اداکارہ کیارا اڈوانی جلد ہی اکشے کمار کے ساتھ فلم ’لکشمی‘ میں دکھائی دیں گی فلم کی ریلیز کے موقع پر کیارا اڈوانی نے ڈیجیٹل میڈیا پلیٹ فارم ’ٹویک انڈیا‘ سے بات کی اور بتایا کہ انہیں کیا چیزیں پسند ہیں اور وہ کب خود کو سب سے زیادہ محفوظ سمجھتی ہیں۔

ٹویک انڈیا نے کیارا اڈوانی سے پوچھا کہ انہوں نے کبھی زندگی میں موت کو قریب سے دیکھا یا وہ زندگی میں کبھی شدید خوف کا شکار ہوئیں؟

جس پر اداکارہ نے زمانہ طالب علمی کا قصہ سنایا اور بتایا کہ جب وہ نوعمر تھیں تو دوستوں کے ساتھ سیر سپاٹے کے لیے گئی تھیں اور اس دوران وہ جس ہوٹل میں رہائش پذیر تھے وہاں آگ لگ گئی تھی اور ان کے کمرے کو بھی آگ نے لیپٹ میں لے لیا تھا۔

اداکارہ نے بتایا کہ آگ لگنے کے ایک گھنٹے بعد وہ نیند سے جاگے تب تک ان کے کمرے میں دھواں بھر چکا تھا اور ان کے چہرے کالے پڑ چکے تھے اور وہ شدید خوف میں نہ جانے کس طرح کمرے سے باہر نکلے اور مرتے مرتے بچے۔

اداکارہ نے ایک سوال کے جواب میں کہا وہ کسی سے بھی رومانس کرنے یا جنسی تعلقات استوار کرنے سے زیادہ فلم دیکھنے یا پیزا کھانے کو ترجیح دیں گی ساتھ ہی وہ رومانس کے بدلے شاپنگ کو منتخب کریں گی۔

کیارا اڈوانی نے ایک سوال کے جواب میں کہا کہ ان کی آنکھیں ہی ان کا سب سے طاقتور اور خطرناک ہتھیار ہیں۔

اداکارہ نے ایک سوال کا جواب دیتے ہوئے اپنی والدہ کا شکریہ بھی ادا کیا اور کہا کہ وہ آج جو کچھ بھی ہیں اپنی والدہ کی وجہ سے ہیں ساتھ ہی انہوں نے کہا کہ وہ خود کو اس وقت ہی دنیا کا محفوظ ترین شخص تصور کرتی ہیں جب وہ والد کے ساتھ ہوتی ہیں۔

خیال رہے کہ 28 سالہ کیارا اڈوانی نے 2014 میں کامیڈی فلم ’فگلی‘ سے کیریئر کا آغاز کیا، وہ محض 22 سال کی عمر میں شوبز انڈسٹری کا حصہ بنی تھیں انہیں 2016 میں ریلیز ہونے والی فلم ’ایم ایس دھونی: دی یونائٹڈ اسٹوری‘ سے شہرت حاصل ہوئی بعد ازاں 2018 میں انہوں نے کرن جوہر کی فلم ’لسٹ اسٹوریز‘ میں بولڈ کردار ادا کرکے سب کو اپنی اداکارہ کا دیوانہ بنا دیا۔

کیارا اڈوانی اب تک ایک درجن سے زائد فلموں میں کام کر چکی ہیں-

جواب چھوڑیں

آپ کا ای میل ایڈریس شائع نہیں کیا جائے گا.