میری خواہش ہے درمیانی راستہ،بلاول کے استعفوں کے بیان پر شیخ رشید کا کیا آیا ردعمل؟

میری خواہش ہے درمیانی راستہ،بلاول کے استعفوں کے بیان پر شیخ رشید کا کیا آیا ردعمل؟

باغی ٹی وی کی رپورٹ کے مطابق وفاقی وزیر داخلہ شیخ رشید احمد نے کہا ہے کہ میری خواہش ہے کہ درمیانی راستہ نکلے تاہم اگر اپوزیشن استعفے دینا چاہتی ہے تو شوق سے دے،

ایف آئی اے ہیڈ کوارٹرز کے دورہ کے بعد میڈیا سے گفتگو کرتے ہوئے وزیر داخلہ شیخ رشید احمد نے کہا کہ ایف اے ٹی ایف سے متعلق وزارت داخلہ نے بہتری کی ہے اور مزید کرے گی ،شہباز شریف اور بلاول بھٹو زرداری کی کل ملاقات ہوئی ہے اور بلاول نے استعفوں کا ایٹم بم چلانے کی دھمکی دے دی ہے لیکن مجھے یقین ہے وہ پھلجھڑی ہوگی کیونکہ پیپلزپارٹی جمہوری عمل پر یقین رکھتی ہے اور اس نے ہمیشہ جمہوری عمل کو سپورٹ کیا۔ تاہم کچھ لوگ انتہائی قدم اٹھانا چاہتے ہیں تاکہ جمہوریت بند گلی میں داخل ہوجائے اور خدانخواستہ جمہوریت کو کوئی خطرات لاحق ہوجائیں۔

شیخ رشید احمد کا کہنا تھا کہ اپوزیشن اگر اسلام آباد آنا چاہتی ہے تو شوق سے آئے، انہوں نے فروری میں لانگ مارچ کا اعلان کیا ہے بہتر ہے وہ اس سے پہلے ہی آجائیں،ہم نے بھی یہاں 126 دن پڑائو ڈالا تھا۔اپوزیشن نے استعفے پارٹی صدر کو دینے ہیں اور مسلم لیگ(ن)کا پارٹی صدر شہباز شریف ہے اور مجھے پورا یقین ہے کہ وہ مثبت سوچ کے ساتھ سیاست کو آگے لے جانے کی بات کریں گے۔ وزیراعظم نے واضح کہہ دیا ہے کہ ہم کرپشن کے سوا تمام معاملات پر بات چیت کے لئے تیار ہیں۔

ایک سوال کے جواب میں شیخ رشید احمد کا کہنا تھا کہ ایگزیٹ کنٹرول لسٹ (ای سی ایل) میں 400 لوگوں کے نام ہیں جنہیں کم کرنے کی ہدایت کی ہے جبکہ بلیک لسٹ میں بھی ہزاروں لوگوں کے نام ہیں انہیں بھی کم کرنے کا کہا ہے،بلاوجہ ان فہرستوں میں نام نہ رکھا جائے امیگریشن میں 3 سال سے زیادہ ایک عہدہ پر رہنے والے کا تبادلہ ہوگا۔انہوں نے کہا کہ ہزاروں کی تعداد میں مختلف قسم کی شکایات ہیں اور ایف آئی اے کو فنڈز کی ضرورت ہے جس پر میں فوری طور پر 2 ارب روپے دینے کا اعلان کر رہا ہوں۔

شیخ رشید احمد کا مزید کہنا تھا کہ پیپلزپارٹی کو سیاست میں بہتر پوزیشن میں دیکھ رہا ہوں جبکہ جس شہباز شریف کو میں جانتا ہوں وہ مذاکرات کا حامی ہیں، آج کے شہباز شریف کا نہیں پتا۔ اگر یہ استعفے دینا چاہتے ہیں تو وزیراعظم نے واضح کہا ہے کہ شوق سے دیں،وہ جب آنا چاہیں آئیں تاہم میں یہ چاہتا ہوں کہ کوئی درمیانی راستہ نکلے

قبل ازیں وزیر داخلہ شیخ رشید احمد نے ایف آئی اے ہیڈکواٹرز اسلام آباد کا دورہ کیا۔ وزارت داخلہ کی طرف سے جاری بیان کے مطابق ایف آئی اے ہیڈکواٹرز آمد پر انہوں نے یاد گار شہداء پر پھول چڑھائےاور شہداء کے لئے دعا کی۔ وزارت داخلہ کی ذمہ داریاں سنبھالنے پر یہ وفاقی وزیر شیخ رشید احمد کا ایف آئی اے کا پہلا دورہ ہے۔

ڈی جی ایف آئی اے واجد ضیاء نے وزیر داخلہ شیخ رشید احمد کو ادارے سے متعلق بریفنگ دی۔سیکرٹری داخلہ یوسف نسیم کھوکھر بھی بریفنگ میں موجود تھے