میری والدہ میری پیدائش پر مایوس ہو گئیں تھیں اقرا عزیز

پاکستان ڈرامہ انڈسٹری کو یک کے بعد ایک ہٹ ڈرامہ دینے والی ورسٹائل اداکارہ اقرا عزیز نے انکشاف کیا ہے کہ میری والدہ بڑی بہن کی پیدائش کے بعد بیٹے کی خواہشمند تھیں لیکن میری پیدائش پر وہ مایوس ہوگئی تھیں اور خوش نہیں تھیں-

باغی ٹی وی : ڈرامہ سیریل ’رانجھا رانجھا کردی‘سمیت متعدد کامیاب ڈرامے دینے والی ورسٹائل اداکارہ اقرا عزیز نے انٹر ویو کے دوران اپنی9 زندگی کے بارے میں دلچسپ انکشافات کئے جنہیں بہت کم ہی لوگ جانتے ہیں –

اقرا عزیز نے بتایا تھا کہ ان کی زندگی میں مالی مشکلات بھی آئیں لیکن ان کی والدہ نے وقار اور فخر کے ساتھ اپنے خاندان کے لیے جدوجہد کی ۔ان کی والدہ نے اپنی دونوں بیٹیوں کی بطور سنگل پیرنٹ پرورش کی ہے اقرا عزیز کی والدہ بااختیار خواتین کی بہترین مثال ہیں انہوں نے نہ صرف اپنے بچوں کی پرورش اکیلے کی بلکہ وہ کراچی کی پہلی فی میل کریم ڈرائیور بھی ہیں۔

ایک اور انٹرویو میں اقرا عزیز نے انکشاف کیا تھا میں یہ نہیں کہتی کہ میری والدہ کی سوچ غلط تھی لیکن ہر ماں کی طرح میری والدہ بھی ایک بیٹا اور بیٹی چاہتی تھیں تاکہ ان کا خاندان مکمل ہوجائے۔

اقرا عزیز کے مطابق چونکہ میری بڑی بہن سدرہ کی پیدائش ہوچکی تھی لہذا جب میں پیدا ہونے والی تھی تو میری والدہ بیٹے کی خواہشمند تھیں لیکن میری پیدائش پر وہ مایوس ہوگئی تھیں اور خوش نہیں تھیں۔

اقرا عزیز نے یہ بھی بتایا کہ میری والدہ مجھے بتاتی ہیں جب میں پیدا ہوئی تو اتنی چھوٹی تھی کہ مرغے کی ٹانگ کے برابر تھی۔ لیکن اب میری والدہ مجھ سے بہت محبت کرتی ہیں یہاں تک کہ میری بڑی بہن سے بھی زیادہ اور ہر معاملے میں مجھے سپورٹ کرتی ہیں۔

اقرا عزیز نے تین سال کی عمر تک اپنے والد کو نہیں دیکھا تھا۔ ان کے والد کام کے سلسلے میں سعودی عرب میں رہتے تھے اور اس وقت پاکستان آئے جب اقرا تین سال کی تھیں۔ لہذا وہ تین سال کی عمر میں پہلی بار اپنے والد سے ملیں۔ بدقسمتی سے جب اقرا 12 برس کی تھیں تو ان کے والد کی ہارٹ اٹیک کی وجہ سے موت ہوگئی۔

اقرا عزیز نے اداکاری کی وجہ سے اپنی تعلیم مکمل نہیں کی۔ انہوں نے کراچی یونیورسٹی میں کامرس ڈیپارٹمنٹ میں داخلہ لیا تھا لیکن وہ اپنا گریجویشن مکمل نہیں کرسکیں۔ تاہم وہ اداکاری اور ماڈلنگ سے بریک لے کر جلد سے جلد تعلیم مکمل کرنا چاہتی ہیں-

اقرا عزیز اداکاری میں تو کسی سے پیچھے نہیں لیکن ان کی حقیقی زندگی بھی کسی فلم سے کم نہیں۔ ان کی زندگی میں ایک وقت ایسا بھی آیا جیسا اکثر فلموں میں دیکھنے کو ملتا ہے۔ 18 ویں لکس اسٹائل ایوارڈز کی تقریب کے دوران یاسر حسین نے ہیرو کی طرح سب کے سامنے گھٹنوں کے بل جھک کر اقرا عزیز کو شادی کی پیشکش کی۔

اقرا عزیز نے بھی کسی فلم کی ہیروئن کی طرح روتے ہوئے یاسر حسین کی شادی کی پیشکش قبول کرتے ہوئے انگوٹھی پہن لی تھی۔ اس واقعے نے پورے میڈیا کی توجہ اپنی جانب کھینچ لی تھی۔ تاہم بہت سے لوگوں کا ماننا ہے کہ شادی کی پیشکش اچانک نہیں تھی بلکہ اقرا عزیز اور یاسر حسین نے پہلے سے اس کی منصوبہ بندی کی ہوئی تھی ۔ تاہم یہ جوڑی 28 دسمبر 2019 کو شادی کے بندھن میں بندھ گئیں-

اقرا عزیز نجی ٹی وی چینل پر نشر ہونے والے ڈرامہ سیریل’ کسک‘ میں دکھائی دے رہی ہیں۔ اس کے علاوہ وہ ڈرامہ سیریل’خدا اور محبت سیزن 3‘ میں بھی دکھائی دیں گی۔

NASFF کا حصہ بننا میرے لئے اعزا ز کی بات ہے اقرا عزیز

جواب چھوڑیں

آپ کا ای میل ایڈریس شائع نہیں کیا جائے گا.