میانوالی،باغی ٹی وی (رپورٹ: احسان اللہ ایاز) مسلم میڈیکل مشن ضلع میانوالی نے ڈسٹرکٹ پریس کلب میں "غزہ تعمیر نو” کے عنوان سے ایک پروقار افطار ڈنر کا اہتمام کیا۔ اس تقریب میں میانوالی کے تاجروں اور عمائدین نے بھرپور شرکت کی، جس سے غزہ کے مظلوموں سے یکجہتی کا اظہار ہوا۔
تقریب کے مہمان خصوصی مرکزی مسلم لیگ پاکستان کے مرکزی رہنما انجینئر حارث ڈار تھے۔ انہوں نے ملٹی میڈیا بریفنگ کے دوران شرکاء سے خطاب کرتے ہوئے کہا کہ مسلم میڈیکل مشن اپنے فلسطینی بھائیوں کے ساتھ ہر ممکن تعاون کے لیے تیار ہے۔ انہوں نے امت مسلمہ سے اپیل کی کہ وہ اس مشکل وقت میں غزہ کے عوام کو تنہا نہ چھوڑیں۔
حاضرین نے غزہ کے مظلوم بھائیوں کے لیے نیک خواہشات کا اظہار کیا اور تاجر برادری نے خصوصی ملاقات میں ہر ممکن تعاون کا یقین دلایا۔
تقریب میں مرکزی مسلم لیگ ضلع میانوالی کے جنرل سیکرٹری شیر افگن، صدر عمیر خان ایڈووکیٹ اور سٹی میانوالی کے جنرل سیکرٹری نے خصوصی شرکت کی۔ مسلم میڈیکل مشن سٹی میانوالی کے سردار ساجد نے مہمانوں کا شکریہ ادا کیا۔
