ڈاکٹرغلام مصطفی بڈانی
میرپورخاص (باغی ٹی وی، نامہ نگار سید شاہزیب شاہ)عالمی روحانی تحریک انجمن سرفروشان اسلام میرپورخاص کی جانب سے پاک افواج کے ساتھ اظہار یکجہتی اور حمایت کے لئے ایک عظیم الشان ریلی کا انعقاد کیا گیا۔ یہ ریلی شہر کی مختلف شاہراہوں سے گزرتی ہوئی مقامی پریس کلب، حیدرآباد روڈ پر پہنچی، جہاں عوام کا جوش و جذبہ قابل دید تھا۔
ریلی کے شرکاء سے خطاب کرتے ہوئے انجمن سرفروشان اسلام میرپورخاص کے امیر اعجاز قادری نے کہا کہ ازلی دشمن بھارت ہمیشہ رات کے اندھیرے میں بزدلانہ وار کرتا ہے، لیکن الحمد للہ پاکستان کی بہادر افواج نے مودی سرکار اور بھارتی فوج کو ایسا دندان شکن جواب دیا ہے کہ وہ بوکھلاہٹ کا شکار ہو چکے ہیں۔ اُن کا کہنا تھا کہ انجمن سرفروشان اسلام ہمیشہ پاک افواج کے شانہ بشانہ کھڑی رہی ہے اور آئندہ بھی ہر قدم پر فوج کا ساتھ دیتی رہے گی۔
انہوں نے مزید کہا کہ انجمن کے بانی و سرپرست حضرت سیدنا ریاض احمد گوہر شاہی کا یہ پیغام ہے کہ پاکستان ایک ابدی حقیقت ہے اور انشاء اللہ وقت قریب ہے جب دنیا کے بڑے فیصلے پاکستان کی رضا و مخالفت سے مشروط ہوں گے۔
ریلی کے دوران شرکاء نے "پاکستان زندہ باد” اور "پاک فوج زندہ باد” کے فلک شگاف نعرے لگائے۔ آخر میں وطن عزیز پاکستان کی سلامتی اور افواج پاکستان کی کامیابی کے لیے خصوصی دعائیں کی گئیں، جس کے ساتھ ریلی پرامن انداز میں اختتام پذیر ہوئی۔
