ملتان(باغی ٹی وی ) کرکٹ ٹیم کے پروٹوکول کے دوران بزرگ شہری پر تشدد کرنے والے ایس ایچ او تھانہ نیو ملتان محمد شفیق کو معطل کر دیا گیا۔
تفصیلات کے مطابق کرکٹ ٹیم کے پروٹوکول کے دوران موٹرسائیکل سوار بزرگ شہری کے گزرنے پر ایس ایچ او شفیق احمد آپے سے باہر ہوگئے۔ انہوں نے بزرگ شہری کو زبردستی چلتی موٹرسائیکل سے اتارا اور سڑک پر گھسیٹ کر تھپڑوں کی بارش کردی۔
بزرگ شہری کی معافی کے باوجود پولیس افسر کا رویہ نہ بدلا، جس کی ویڈیو سوشل میڈیا پر وائرل ہوگئی۔ ویڈیو سامنے آنے کے بعد پولیس حکام نے واقعے کا نوٹس لے لیا، جبکہ آر پی او نے سی پی او ملتان کو فوری کارروائی کی ہدایت دی۔
سی پی او نے ایس ایچ او نیو ملتان محمد شفیق کو معطل کر دیا اور واقعے کی مکمل تحقیقات کا حکم دے دیا۔
