مراد علی شاہ کو وارننگ، خرم شیر زمان

مراد علی شاہ کو وارننگ دیتے ہیں کہ انتقامی کارروائیاں بند کریں، ہم نہیں چاہتے کہ شہر کا امن دوبارہ خراب ہو۔ خرم شیر زمان

پی ٹی آئی ورکرز کی گرفتاریوں کا سلسلہ نہیں رکا تو پورے شہر میں احتجاج کریں گے۔ خرم شیر زمان

انہیں تکلیف ہے کہ ہم ان کی کرپشن اور نیب کیسز پر آواز اٹھا رہے ہیں۔ خرم شیر زمان

کراچی (21 فروری) پاکستان تحریک انصاف کراچی کے صدر و رکن سندھ اسمبلی خرم شیر زمان نے انصاف ہاوس میں پریس کانفرنس سے خطاب کرتے ہوئے کہا ہے کہ پیپلز پارٹی انتقامی کارروائیوں کی تمام حدیں پار کر چکی ہے۔ پولیس پیپلز پارٹی کے کہنے پر پی ٹی آئی کارکنان اور رہنماؤں کے خلاف غنڈہ گردی کررہی ہے۔ رات کے اوقات میں چادر اور چار دیواری کا تقدس پامال کیا جارہا ہے۔پاکستان تحریک انصاف اس پولیس گردی کی شدید مذمت کرتی ہے۔ پیپلز پارٹی اپنے سیاسی مخالفین پر جھوٹے کیسز کرنے میں ماہر ہے۔ سندھ حکومت باز آجائے، ورکرز کو سڑکوں پر لانے کے لئے مجبور نہ کیا جائے۔ اس موقع پر پی ٹی آئی کراچی کے سینئر نائب صدر محمود مولوی، رکن سندھ اسمبلی ڈاکٹر عمران علی شاہ اور دیگر موجود تھے۔ خرم شیر زمان نے مزید کہا کہ پیپلز پارٹی غریبوں کو اٹھانے اور پریشان کرنے میں خاصی شہرت رکھتی ہے۔ پولیس کے ذریعے سندھ حکومت نے بہت کچھ غلط کیا ہے۔ ہم عوام کو بتانا چاہتے ہیں کہ سندھ حکومت پولیس کو استعمال کرتے ہوئے اختیارات کا ناجائز استعمال کر رہی ہے۔ سندھ پولیس چادر اور چار دیواری کے تقدس کو پامال کررہی ہے۔ اس وقت پاکستان تحریک انصاف کراچی کی سب سے بڑی سیاسی جماعت ہے، بڑے سے بڑا احتجاج کرنا ہمارے لیے کوئی مسئلہ نہیں۔ پیپلز پارٹی کے اقدامات براہ راست تھر پارکر کے انتخابات پر اثرانداز ہورہے ہیں۔ ہمیں متعدد فون کالز آ چکی ہیں کہ تھر میں پیپلز پارٹی دھاندلی کررہی ہے۔ پیپلز پارٹی خود کو مظلوم بنا کر میڈیا کے سامنے پیش کر رہی ہے۔ پیپلز پارٹی ڈر و خوف کی سیاست کر رہی ہے۔ میں پولیس حکام سے سوال کرتا ہوں کہ آپ کیوں پارٹی بنے ہوئے ہیں۔ پولیس کا کام سیاسی کاروائیاں کرنا نہیں ہے۔ یہ کیوں وزیر اعلی سے سوال نہیں کرتے کہ ہم غیر قانونی کام کیوں کروائے جارہے ہیں۔ سندھ حکومت تو چلی جائے گی لیکن آئی جی سندھ یہیں رہیں گے۔ وزیر اعظم عمران خان سے درخواست کرتے ہیں کہ اس معاملے کا نوٹس لیں۔ پیپلز پارٹی ہم میں سے کسی نہ کسی کو مارنا چاہتی ہے۔ انہوں نے مزید کہا کہ الیکشن کمیشن غیر جانبداری کا مظاہرہ کرتے ہوئے پی ایس 88 کے الیکشن کے ووٹوں کی تصدیق کرے۔ وزیر اعلی سندھ کے وزراء بھی نالائق ہیں۔ بلاول کی پھپھو نے صحت کے نظام کو تباہ کر دیا، جبکہ سندھ حکومت نے سندھ کا ہر شعبہ تباہ کردیا۔ انہیں تکلیف ہے کہ ہم ان کی کرپشن اور نیب کیسز پر آواز اٹھا رہے ہیں۔ مراد علی شاہ کو وارننگ دیتے ہیں کہ انتقامی کارروائیاں بند کریں، ہم نہیں چاہتے کہ شہر کا امن دوبارہ خراب ہو۔ اگر ہمارے کارکنان کے خلاف کاروائیاں بند نہ کی گئیں تو شدید احتجاج کریں گے۔ سندھ حکومت نے اپوزیشن لیڈر کو جیل میں ڈالا ہے، ہم ڈرنے والوں میں سے نہیں ہیں ہمیں بھی جیل بھیج دیں۔ پی ٹی آئی ورکرز کی گرفتاریوں کا سلسلہ نہیں رکا تو پورے شہر میں احتجاج کریں گے۔ خرم شیر زمان کا مزید کہنا تھا کہ حلیم عادل شیخ کی جان کو خطرہ ہے، کل رات بھی حلیم عادل شیخ کو گھر کا کھانا کھانے نہیں دیا گیا۔ شک ہے کہ حلیم عادل شیخ کے کھانے میں زہر نہ ملا دیں۔ اپوزیشن لیڈر کو کچھ ہوا تو ذمہ دار مراد علی شاہ اور بلاول زرداری ہوں گے۔