ننکانہ :ہیڈ بلوکی پر سیلابی صورتحال سے نمٹنے کی فرضی مشقیں کی گئیں

ننکانہ صاحب (باغی ٹی وی) نامہ نگار احسان اللہ ایازضلعی انتظامیہ ننکانہ صاحب کے زیر اہتمام دریائے راوی ہیڈ بلوکی کے مقام پر ممکنہ سیلابی صورتحال سے نمٹنے کے لیے ریسکیو 1122 کی قیادت میں بڑے پیمانے پر فرضی مشقوں کا انعقاد کیا گیا۔ ان مشقوں میں ریسکیو 1122، محکمہ صحت، لائیوسٹاک، ایریگیشن، سول ڈیفنس اور دیگر متعلقہ اداروں نے بھرپور شرکت کی۔

ڈپٹی کمشنر ننکانہ صاحب محمد تسلیم اختر راؤ نے ایڈیشنل ڈپٹی کمشنرز، اسسٹنٹ کمشنر، ڈسٹرکٹ ایمرجنسی آفیسر اور دیگر ضلعی افسران کے ہمراہ بوٹس میں بیٹھ کر سیلاب سے متاثرہ ممکنہ علاقوں کا جائزہ لیا۔ مشقوں کے دوران سیلاب آپریشنز میں استعمال ہونے والے آلات، مشینری اور دیگر سہولیات کے اسٹالز کا تفصیلی معائنہ بھی کیا گیا۔

ڈسٹرکٹ ایمرجنسی آفیسر ریسکیو 1122 اکرم پنوار و دیگر افسران نے ڈپٹی کمشنر کو موک ایکسرسائز کے مختلف مراحل پر بریفنگ دی۔ اس موقع پر ریسکیو اہلکاروں اور سول ڈیفنس کے غوطہ خوروں نے پیشہ ورانہ انداز میں ڈوبنے والوں کو بچانے کی عملی مشق کا مظاہرہ کیا۔ جانوروں کو بیماریوں سے بچانے کے لیے ادویات کی فراہمی اور خشک چارے کے انتظامات کا بھی جائزہ لیا گیا۔

ڈپٹی کمشنر نے تمام ضلعی اداروں کی تیاریوں پر اظہارِ اطمینان کرتے ہوئے کہا کہ مشقوں کا مقصد پیشگی انتظامات اور اداروں کے درمیان کوآرڈینیشن کو مضبوط بنانا ہے۔ ممکنہ سیلابی صورتحال سے نمٹنے کے لیے تمام محکمے الرٹ اور مکمل طور پر فعال ہیں۔ ہنگامی حالات میں شہریوں کی جان و مال کے تحفظ کو یقینی بنانے کے لیے تمام دستیاب وسائل کو بروئے کار لایا جائے گا۔

انہوں نے ریسکیو 1122 کے جوانوں کو خراج تحسین پیش کرتے ہوئے کہا کہ وہ عوامی خدمت کے لیے دن رات سرگرم ہیں، اور ہمیں ایک قوم کی حیثیت سے قدرتی آفات اور چیلنجز کا متحد ہو کر مقابلہ کرنا ہوگا۔