ننکانہ :ریسکیو 1122ماہانہ کارکردگی کے حوالے سے اجلاس منعقد ہوا
ننکانہ صاحب ،باغی ٹی وی( نامہ نگار احسان اللہ ایاز)ضلعی ہیڈ کوارٹرز پنجاب ایمرجنسی سروس ریسکیو1122 ننکانہ صاحب میں ماہانہ کارکردگی کے حوالے سے اجلاس منعقد ہوا جس کی صدارت ڈسٹرکٹ ایمرجنسی آ فیسر محمد اکرم پنوار نے کی۔
اجلاس میں کنٹرول روم انچارج محمد نوید، ریسکیو سیفٹی آفیسرعلی عمران،اسٹیشن کوارڈینیٹر کامران علی،میڈیا کوارڈینیٹر علی اکبر اور تمام ریسکیو آفیسرز و انچارجز نے شرکت کی۔
اجلاس میں کنٹرول روم انچارج محمد نوید نے ڈسٹرکٹ ایمرجنسی آفیسر محمد اکرم پنوار کو بریفنگ دیتے ہوئے بتایاپنجاب ایمرجنسی سروس ریسکیو1122ننکانہ صاحب کومارچ میں 9967 موصول ہونے والی کالز میں 2765ایمرجنسی کالز تھیں۔2765 ایمرجنسیز کالز پر2750متاثرین کو ریسکیو سروس مہیا کی گئی جن میں 637روڈ ٹریفک ایکسیڈنٹ،1749میڈیکل 28,فائر کیس، پانی میں ڈوبنے کے 2واقعات،65لڑائی جھگڑے اور تشدد اور284متفرق ایمرجنسیز تھیں جس میں 985زخمیوں کو موقع پر طبی امداد دی جبکہ1710متاثرین کو طبی امداد دینے کے بعد مختلف ہسپتالوں میں منتقل کر دیا گیا مزید براں اس کے علاوہ ضلعی سطح پر علاج کی سہولیات میسر نہ ہونے کیوجہ سے ڈاکٹرز نے185مریضوں کو ریفر کر دیا۔
اس موقع پر ڈسٹرکٹ ایمرجنسی آفیسر محمد اکرم پنوار نےکہا گندم کی کٹائی کا سیزن شروع ہونے والا ہے اور آگ کے حادثات معمول سے نمایاں حد تک بڑھ جاتے ہیں۔کسان ٹرانسفارمر والے الیکٹرک پول کے اردگرد والی جگہوں کو بروقت گھاس بھوس اور فصل وغیرہ سے صاف کر دیں تا کہ شارٹ سرکٹ سے آگ نہ پھیل پائے اور گندم کی باقیات کو آگ لگانا قانوناََ جرم ہے لہذا آگ لگانے سے اجتناب کریں اور فصلوں میں آگ لگنے کی صورت میں فوراََ ٹیوب ویل چلا کر کھال میں پانی بھر دیں تا کہ آگ مزید نہ پھیل سکے.
