fbpx

قوم ایک اور صدمے سے دوچار

شیخوپورہ (نمائندہ باغی ٹی وی محمد فہیم شاکر سے )ہاکی ورلڈ کپ 94کے فاتح، پرائڈ آف پرفارمنس، اولمپیئن مایہ ناز کھلاڑی نوید عالم بلڈ کینسر سے شکست کھاگئے، وہ ان دنوں شوکت خانم ہسپتال میں زیر علاج تھے جہاں انہیں گزشتہ رات پہلی کیموتھراپی کی گئی تو ان کی حالت بگڑ گئی اور وہ 13جولائی بروز بدھ اپنے خالق حقیقی سے جاملے
نوید عالم مرحوم کی عمر 49برس تھی ایک بیوہ دو بیٹے اور دو بیٹیاں سوگواروں میں چھوڑی ہیں ان کی نماز جنازہ ہاکی گراؤند شیخوپورہ میں ادا کی گئی جس میں سابق قومی ہاکی کھلاڑیوں، ارکان اسمبلی سمیت ہر شعبہ فکر سے تعلق رکھنے والے شہریوں کی بڑی تعداد نے شرکت کی نوید عالم ان کے آبائی علاقہ نبی پورہ کے قبرستان میں ان کے والد محترم چوہدری دین محمد گجر مرحوم کے پہلو میں سپرد خاک کردیا گیا
قومی ہیرو نوید عالم کو 12روز قبل کینسر کے مرض کی تشخیص ہوئی تھی انہیں شوکت خانم ہسپتال میں علاج معالجہ کیلئے داخل کروادیا گیا ان کے علاج معالجہ کے اخراجات سندھ حکومت ادا کررہی تھی مرحوم نوید عالم کی وفات سے ہاکی کا ایک باب بند ہوگیا، انہوں نے سکول لائف سے ہی ہاکی کے کھیل کے فروغ کیلئے دن رات کام کیا وہ ہاکی فیڈریشن کے عہدیدار بھی رہے پاکستان بنگلہ دیش اور دیگر ممالک کی قومی ہاکی ٹیموں کے کوچ کے فرائض سرانجام دیئے، نوید بیجنگ اولمپکس میں پاکستانی ہاکی ٹیم کے ہیڈ کوچ بھی رہ چکے ہیں، انہوں نے اولمپکس ورلڈ کپ، چیمپئن ٹرافی اور ایشئن گیمز سمیت بے شمار ایونٹس میں پاکستان کی نمائندگی کی
ان کی زندگی میں کئی نشیب و فراز آئے مگر وہ ہاکی کو زندہ رکھنے اور پھر سے ہاکی کو بلندیوں پر لیجانے کی جستجو کرتے رہے نوید عالم نے اپنے وطن کیلئے کئی نیشنل و انٹرنیشنل اعزازات جیتے، نوید عالم نے چند ماہ قبل ہی عملی سیاست میں حصہ لیا اور پاکستان تحریک انصاف میں شمولیت اختیار کرلی تھی۔