اوکاڑہ: ریسکیو 1122 کی نومبر کی کارکردگی رپورٹ جاری

اوکاڑہ (باغی ٹی وی,نامہ نگارملک ظفر) ریسکیو 1122 اوکاڑہ نے گزشتہ ماہ کے دوران 4375 ایمرجنسیز پر بروقت کارروائی کرتے ہوئے 4137 افراد کو مدد فراہم کی۔ 1524 متاثرین کو موقع پر ابتدائی طبی امداد دی گئی، جبکہ 2613 افراد کو ہسپتال منتقل کیا گیا۔

ڈسٹرکٹ ایمرجنسی آفیسر انجینئر احتشام کی زیر صدارت سنٹرل اسٹیشن اوکاڑہ میں منعقدہ ماہانہ کارکردگی اجلاس میں یہ تفصیلات پیش کی گئیں۔ رپورٹ کے مطابق گزشتہ ماہ کل 15206 کالز موصول ہوئیں، جن میں سے 4375 حقیقی ایمرجنسی کالز تھیں، جبکہ 7633 غیر متعلقہ، 3165 معلوماتی، 21 غلط اور 12 جھوٹی کالز تھیں۔

روڈ ٹریفک حادثات: 1076 حادثات میں 1125 افراد متاثر ہوئے، 10 جان بحق اور 533 کو ہسپتال منتقل کیا گیا،میڈیکل ایمرجنسیز: 2736 کیسز رپورٹ ہوئے۔آتشزدگی: 62 واقعات میں 18 ملین روپے سے زائد مالیت کی پراپرٹی محفوظ کی گئی۔جرائم اور متفرق حادثات: 109 کرائم اور 392 متفرق واقعات رپورٹ ہوئے۔

ریسکیو موٹر بائیک سروس نے 2137 ایمرجنسیز پر 3.65 منٹ کے اوسط وقت میں کارروائی کرتے ہوئے 2095 افراد کو مدد فراہم کی۔ پیشنٹ ریفرل سسٹم کے تحت 319 مریضوں کو بہتر طبی امداد کے لیے دیگر ہسپتالوں میں منتقل کیا گیا، جن میں 127 افراد کو ڈسٹرکٹ ہیڈکوارٹر ہسپتال اوکاڑہ اور 192 کو دیگر اضلاع کے ہسپتالوں میں پہنچایا گیا۔

ریسکیو 1122 اوکاڑہ کی بروقت کارروائیوں کو عوام نے سراہتے ہوئے ان کے کردار کی تعریف کی ہے۔