ممتاز حیدر
پاکستان مرکزی مسلم لیگ کے زیر اہتمام آپریشن بُنْيَانٌ مَّرْصُوْص کی کامیابی پر ملک بھر میں یومِ فتح منایا گیا۔ لاہور، فیصل آباد، گوجرانوالہ، بہاولنگر، پشاور، گجرات، سرگودھا، مظفرگڑھ ،ننکانہ صاحب سمیت متعدد شہروں میں ریلیاں نکالی گئیں جن میں شہریوں، وکلا، ڈاکٹرز، بچوں، اور سول سوسائٹی کے افراد نے بڑی تعداد میں شرکت کی۔
ریلیوں میں شرکاء نے پاکستانی پرچم تھامے "پاکستان زندہ باد” اور "افواج پاکستان پائندہ باد” کے فلک شگاف نعرے لگائے۔ پشاور، ملتان اور لاہور سمیت کئی شہروں میں عوام نے خوشی کے اظہار کے طور پر مٹھائیاں بھی تقسیم کیں۔قاری محمد یعقوب شیخ، چوہدری محمد سرور، شیخ فیاض احمد، مزمل اقبال ہاشمی، حافظ ابوالحسن اور احسن تارڑ سمیت مرکزی مسلم لیگ کے رہنماؤں نے مختلف شہروں میں ریلیوں سے خطاب کیا۔ قاری محمد یعقوب شیخ کا کہنا تھا کہ بھارتی جنگی جنون کا افواج پاکستان نے چند گھنٹوں میں بھرپور اور منہ توڑ جواب دے کر دشمن کو دنیا کے سامنے رسوا کر دیا ہے۔ دہلی دہلا، راجھستان اور گجرات میں جوابی کارروائی نے بھارتی غرور خاک میں ملا دیا۔
لاہور میں مزمل اقبال ہاشمی نے مال روڈ پر یوم فتح کی ریلی سے خطاب کرتے ہوئے کہا کہ ہم نے بھارت کو دن کے اجالے میں جواب دیا، اور اگر دشمن نے دوبارہ ایسی حرکت کی، تو دوگنا جواب دیں گے،فیصل آباد میں ضلع کونسل چوک سے گھنٹہ گھر تک نکالی گئی ریلی کی قیادت شیخ فیاض احمد اور محمد احسن تارڑ نے کی۔ گھنٹہ گھر پر افواج کی کامیابی کی خوشی میں مٹھائی بھی تقسیم کی گئی۔ملتان میں یومِ فتح ریلی پریس کلب کے باہر نکالی گئی جبکہ حافظ آباد میں جناح چوک سے فوارہ چوک تک شہریوں کی بڑی تعداد نے شرکت کی۔ تحصیل شاہ کوٹ مین بازار ضلع ننکانہ صاحب میں پاکستان زندہ باد ریلی نکالی گئی جس کی قیادت ثاقب مجید نے کی، دیگر شہروں میں بھی عوام نے قومی جوش و جذبے کے ساتھ افواجِ پاکستان کو خراج تحسین پیش کیا۔
