شمالی وزیرستان:پاک فوج کا آپریشن، ایک دہشت گرد ہلاک

خیبر پختونخوا کے قبائلی ضلع شمالی وزیرستان میں پاک فوج کے آپریشن کے دوران ایک دہشت گرد ہلاک ہوگیا-

باغی ٹی وی : پاک فوج کے شعبہ تعلقات عامہ ‘آئی ایس پی آر’ کے مطابق شمالی وزیرستان کے علاقے میرعلی میں دہشت گردوں کی موجودگی کی تصدیق کی اطلاع پر ، فوجیوں نے دہشت گردوں کے ٹھکانے پر آپریشن کیا اس دوران دہشت گردوں کے ساتھ فائرنگ کا تبادلہ ہوا جس میں ایک دہشت گرد ہلاک ہو گیا جبکہ دیگر فرار ہو گئے ۔ ہلاک دہشت گرد کے قبضے سے اسلحہ و بارود بھی برآمد ہوا علاقے میں ابھی کلیئرنس آپریشن جاری ہے۔

اس سے قبل شمالی وزیرستان کے علاقے گھریوم میں دہشت گردوں نے سیکیورٹی فورسز کی پوسٹ پر حملہ کیا تھا سیکیورٹی اہلکاروں نے حملے کا بھرپور جواب دیا تھا تاہم دہشت گردوں کے ساتھ فائرنگ کے تبادلے میں 30 سالہ سپاہی محمد عامر اقبال شہید ہوگئے تھے-

قبل ازیں شمالی وزیرستان کے علاقے اسپن وام میں سیکیورٹی فورسز کی گاڑی پر دہشت گردوں کے حملے میں فرنٹیئر کور (ایف سی) کے 4 جوان اور ایک لیویز سب انسپکٹر شہید ہوگئے تھے۔

اس سے قبل خیبر پختونخوا کے ضلع ٹانک میں کالعدم تحریک طالبان پاکستان (ٹی ٹی پی) کے دہشت گردوں کے خلاف انٹیلی جنس اطلاع پر کیے گئے آپریشن میں پاک فوج کے کپتان شہید ہو گئے تھے۔

بیان میں کہا گیا تھا کہ سیکیورٹی فورسز نے علاقے میں دہشت گردوں کی موجودگی کی اطلاع ملنے کے بعد آپریشن کیا تھا۔

اس سلسلے میں بتایا گیا تھا کہ فائرنگ کے تبادلے کے دوران پاکپتن سے تعلق رکھنے والے 27 سالہ کیپٹن سکندر نے جام شہادت نوش کیا تھا۔

بیان میں مزید کہا گیا تھا کہ فائرنگ کے تبادلے میں تحریک طالبان کا دہشت گرد کمانڈر خواجہ دین عرف شیر خان بھی مارا گیا جبکہ دہشت گردوں کے ٹھکانے سے اسلحہ اور گولہ بارود بھی برآمد کیا گیا۔