پاک بحریہ کے جہاز پی این ایس نصر کی انسانی ہمدردی کے تحت مشن کی کامیاب تکمیل کے بعد کراچی پورٹ آمد

0
27

کراچی، 14 اپریل 21: پاک بحریہ کا جہاز نصر افریقی ممالک میں تین ماہ جاری رہنے والے انسانی ہمدردی اور ڈیزاسٹر ریلیف مشن کی کامیاب تکمیل کے بعد کراچی پورٹ پہنچ گیا۔ افریقی براعظم میں تعیناتی کے دوران پاک بحریہ کے جہاز نصرنے جبوتی ، سوڈان ، بینن اور نائیجر میں ایک ہزار ٹن چاول پاکستان کی عوام کی جانب سے تحفہ کے طور پر پہنچائے۔ جہاز نے کینیا کی بندرگاہ ممباسا کا خیر سگالی دورہ بھی کیا۔ انسانی ہمدردی اور ڈیزاسٹر ریلیف مشن کی منصوبہ بندی 2020 میں نائیجر کے شدید سیلاب اور خشک سالی کی لپیٹ میں آنے کے بعد کی گئی ، جس سے بڑے پیمانے پر تباہی واقع ہوئی تھی۔

پورٹ کالز کے دوران ، میزبان بحری افواج کے اعلی حکام نے جہاز کا پرتپاک استقبال کیا۔ خیر سگالی اور انسان دوستی کے ناطے غذائی امداد جبوتی ، سوڈان ، بینن اور نائیجر کے مقامی حکام کے حوالے کی گئی۔ میزبان ممالک کے عہدیداران کی جانب سے حکومت پاکستان اور پاک بحریہ کے لئے انسان دوستی کے اس عمل پر خصوصی خراج تحسین پیش کیاگیا۔علاوہ ازیں ملاقاتوں کے دوران پاکستان اور میزبان ممالک کے مابین دوستی کے تعلقات کو مزید مستحکم کرنے کے لئے مشترکہ کاوشوں کی ضرورت پر زور دیا گیا۔

کراچی پورٹ پہنچنے پر پاک بحریہ کے جہاز نصر کا کمانڈر پاکستان فلیٹ اور پاک بحریہ کے دیگر اعلی عہدے داروں کے ساتھ ساتھ وزارت خارجہ کے نمائندوں نے بھی استقبال کیا۔ اس موقع پر پاک بحریہ کا بینڈ بھی موجود تھا جس نے پاکستان کے قومی ترانے اور دیگر دھنوں سے محظوظ کیا۔اس مشن کی منصوبہ بندی حکومت پاکستان کی جانب سے ” انگیج افریقہ “ پالیسی کے تحت افریقی ممالک کے ساتھ باہمی تعاون کے نئے راستے کھولنے اور دوستی کے رشتوں کو مزید تقویت فراہم کرنے کے لئے کی گئی تھی۔

Leave a reply