fbpx

پاک بحریہ نے گالف چیمپین شپ کا آغاز کردیا

25 ویں چیف آف دی نیول اسٹاف اوپن گالف چیمپیئن شپ 2021، 8 سے 11 جولائی 2021 تک کراچی گالف کلب میں کھیلی جارہی ہے، پیٹرن پاک نیوی گالف (ساوتھ)، کموڈورمحمد وقار نے آج کراچی گالف کلب میں افتتاحی تقریب سے خطاب کیا ہے، تقریب میں کمانڈر کراچی، ریئر ایڈمرل اویس احمد بلگرامی نے بطورمہمان خصوصی شرکت کی ہے.
25ویں چیف آف دی نیول سٹاف اوپن چیمپیئن شپ پروفیشنلز، سینئر پروفیشنلز، جونیئرپروفیشنل، امیچرز، سینئرز، ویٹرنز، لیڈیزاورجونیئرز کیٹیگریزمیں کھیلی جائے گی، پروفیشنلزاورامیچرزکے 72 ہولز میچز، جونیئرزکے لئے 18 ہولز میچز، خواتین اورسینئرزکے 36 ہولزمیچز اورویٹرنز کے لئے 9 ہولزکے میچزرکھے گئے ہیں، ٹورنامنٹ کی انعامی رقم 8.5 ملین روپے ہے، اس کے علاوہ ہول ان ون کے فاتح کے لئے” ٹویوٹا فارچیونر”اوردیگر کیٹیگریزکے فاتحین کیلئے بہت سارے مزید انعامات رکھے گئے ہیں۔
پاکستان گالف فیڈریشن کے کیلنڈر میں قومی سطح کے گالف ایونٹ کو شامل کرنے کے لئے 1995 میں چیف آف دی نیول اسٹاف گالف چیمپین شپ کا پہلا ایڈیشن کھیلا گیا تھا، جس کے بعد یہ قومی گالف سرکٹ کا باقاعدہ اوراہم ایونٹ بن چکا ہے، چیمپین شپ کا باقاعدہ انعقاد پاک بحریہ کی قومی سطح پر اس کھیل کے فروغ کے لئے وابستگی کا مظہر ہے۔
پاک بحریہ ہمیشہ قومی، بین الاقوامی سطح پر مختلف کھیلوں کے فروغ کے لئے سرگرم عمل رہی ہے، گالف کے علاوہ، پاک بحریہ باقاعدگی سے کھیلوں کے مقابلوں کا انعقاد کرتی رہی ہے، جس میں چیف آف دی نیول اسٹاف انٹرنیشنل اسکواش چیمپیئن شپ، چیف آف دی نیول اسٹاف اوپن ہاکی چیمپیئن شپ، چیف آف دی نیول اسٹاف شوٹنگ چیمپیئن شپ اورنیشنل سیلنگ چیمپیئن شپ شامل ہیں، پاک بحریہ نے چند سال قبل انٹرنیشنل ملٹری اسپورٹس کونسل سیلنگ چیمپیئن شپ کا انعقاد کیا تھا، جس میں 12 مختلف ممالک کی فوجی ٹیموں نے حصہ لیا تھا، 2018 میں چیف آف دی نیول اسٹاف اوپن ایشین ٹورگالف چیمپیئن شپ بھی اسی مقام پرمنعقد کی گئی تھی، ایسے کھیلوں کے انعقاد سے نہ صرف معاشرے میں صحت مندانہ سرگرمیاں متعارف کروانے میں مدد ملتی ہے بلکہ پوری دنیا میں پاکستان کا تصور ایک کھیل دوست ملک کی حیثیت سے اجاگر کرنے میں بھی مدد ملے گی، ایشین گولڈ میڈلسٹ منیرصادق، مامون صادق، ذکا اللہ، نادیہ رئیس اورکرکٹ کی دنیا کے مشہور بلے بازفخرزمان اوراولمپک کوالیفائنگ شوٹرجی ایم بشیر پاک بحریہ کے پلیٹ فارم سے بین الاقوامی سطح پرنام کمانے والے افرادمیں شامل ہیں۔
افتتاحی تقریب میں عنبرتانیہ انصاری جنرل مینیجرمارکیٹنگ اینگروکارپوریشن لمیٹڈ، اسپانسرز، معززسول فوجی حضرات اورسینئر کھلاڑیوں نے شرکت کی ہے.