پاکستان میں معیشت بہتر ہورہی ہے،انشااللہ دوبارہ ایشیئن ٹائیگربنے گا،نواز شریف

لندن: مسلم لیگ (ن) کے صدر نواز شریف نے کہا ہے کہ جن لوگوں نے خواجہ آصف کے ساتھ یہ حرکت کی، ان کے نصیب میں یہی ہے، لوگوں کے پیچھے بھاگنا، یہی ان کی ٹریننگ اور گرومنگ کی گئی ہے۔

باغی ٹی وی: لندن میں ورکرز کنونشن سے خطاب میں نواز شریف کا کہنا تھاکہ کارکنوں کی جماعت کےلیےخدمات قابل تعریف ہیں پاکستان ترقی کی راہ پر گامزن ہورہا ہے، پاکستان میں معیشت بہتر ہورہی ہے ملک آگے بڑھ رہا ہے، ن لیگ کی حکومت میں ہمیشہ ملک نےترقی کی اور پاکستان انشااللہ دوبارہ ایشیئن ٹائیگربنے گا، اگر ترقی میں خلل نہ ڈالا جاتا تو اب تک پاکستان ایشیئن ٹائیگربن چکا ہوتا۔

نوازشریف نے کہا کہ پاکستان کواپنے ذاتی اور چھوٹے مفادات کیلیے نقصان پہنچایا گیا اور ملک کو داؤ پر لگایا گیا، ترقی کرتے پاکستان میں وزیراعظم کواٹھا کرگھربھیج دیا گیا جبکہ مجھے پارٹی کی صدارت سے بھی ہٹایا اور تاحیات پابندی لگائی گئی ، یہ فیصلے ملک کیلئے نہیں اپنی ذات کیلئے کیے گئے تھے، اپنےگریبان میں جھانکیں، ملک کی تباہی کے ذمہ دارآپ ہیں، ایسے فیصلے کر کے ملک کا ستیاناس کر دیا گیا۔

خواجہ آصف کے ساتھ پیش آئے بدتمیزی کے واقعے پر نواز شریف کا کہنا تھاکہ جن لوگوں نےخواجہ آصف کے ساتھ یہ حرکت کی، ان کے نصیب میں لوگوں کے پیچھے بھاگنا ہے، ان لوگوں کو اور کوئی کام نہیں ہے، ایک جگہ کھڑے ہوکر مردہ باد کے نعرہ لگانا، دھمکیاں دینا، یہی ان کی ٹریننگ اور گرومنگ کی گئی ہے، ان لوگوں کے نصیب میں ہی ایسا لکھا ہوا ہے خواجہ آصف مرد مجاہد ہیں جہاں کھڑے ہو جاتے ہیں پھر بیٹھتے نہیں، خواجہ آصف نے ہمیشہ ہرصورتحال کا جوانمردی سے مقابلہ کیا ہے، ان کو کالج کے زمانے سے جانتا ہوں۔

نواز شریف نے پی ٹی آئی کا نام لیے بغیر سوال اٹھایا کہ آپ کی پارٹی کو پاورمیں لایا گیا لیکن آپ نے کیا کارکردگی دکھائی؟ بلین ٹری سونامی، 50 لاکھ گھراور ڈیم کہاں ہیں؟ کوئی ایک منصوبہ بتادیں جس پرفخرکرسکیں یہ بس قوم کو بدتمیزی، بدتہذیبی والا کلچردینے آئے تھے اچھا ہوا ان (پی ٹی آئی) سے جان چھوٹ گئی، وہ اسی طرح نعرے لگاتے رہیں گے اور ہم ملک کی خدمت کرتے رہیں گے۔