لندن بیانیہ مسترد، تنقید کرنے والے اقتدار کی بھیک بھی فوج سے ہی مانگ رہے ہیں، علامہ طاہر اشرفی

پاک فوج پر تنقید کرنے والے اقتدار کی بھیک بھی فوج سے ہی مانگ رہے ہیں، علامہ طاہر اشرفی

باغی ٹی وی کی رپورٹ کے مطابق وزیراعظم عمران خان کے مشیر اور پاکستان علماء کونسل کے چیئرمین علامہ طاہر محمود اشرفی نے کہا ہے کہ پاکستان کو کمزور کرنے کیلئے افواج پاکستان اور ملک کے سلامتی کے اداروں کو بدنام کرنے کی سازشیں کی جا رہی ہیں ،

علامہ طاہر اشرفی کا کہنا تھا کہ پاکستان دشمن قوتیں پاکستان میں شام ، عراق ، یمن ، لیبیا جیسا کھیل کھیلنا چاہتی ہیں ، افواج پاکستان اور ملک کے سلامتی کے اداروں کے سربراہوں کو نشانہ بنانے کا واحد مقصد پاک فوج اور عوام کے درمیان تقسیم پیدا کرناہے جسے پاک فوج اور عوام مسترد کر چکی ہیں۔

یہ بات چیئرمین پاکستان علماءکونسل اور وزیر اعظم کے معاون خصوصی حافظ محمد طاہر محمود اشرفی نے لاہور میں مختلف مکاتب فکر کے علما و مشائخ سے گفتگو کرتے ہوئے کہی۔ علامہ طاہر اشرفی کا کہنا تھا کہ پاکستانی قوم اور فوج نے مل کر دہشت گردی اور انتہا پسندی کو شکست دی ہے۔بعض سیاسی رہنما اقتدار کے حصول کیلئے ایک شام پاک فوج کو نشانہ بناتے ہیں اور اگلی صبح پاک فوج سے اقتدار کی بھیک مانگتے ہیں۔لندن بیانیہ کا واحد مقصد پاک فوج کو کمزور کرنا اور اقتدار کا حصول ہے۔

علامہ طاہر اشرفی کا مزید کہنا تھا کہ کہ جمہوریت کا نام لے کر فوج سے حکومت کا ہٹانے کا مطالبہ کرنے والوں کا اصل بیانیہ قوم نے دیکھ لیا ہے ، بعض سیاسی رہنمائوں کے نزدیک جمہوریت صرف ان کا اقتدار ہے اور ووٹ کی عزت کی بات کرنے والے آج فوج سے مطالبہ کر رہے ہیں کہ وہ عمران خان کی حکومت کو ہٹا دیں اگر فوج اور ملک کے سلامتی کے ادارے غیر جمہوری عمل کر کے اقتدار لندن بیانیہ والوں کے حوالے کر دیں تو وہ بہت اچھے ہوں گے اور اگر وہ جمہوری اصولوں اور آئین کے مطابق اپنا کردار ادا کریں تو جمہوریت اور آئین کا نام لینے والوں کو یہ قبول نہیں ہے۔

علامہ طاہر اشرفی کا مزید کہنا تھا کہ کہ پاکستان کی عوام جانتی ہے کہ لندن بیانیہ کے مقاصد کیا ہیں اور لندن بیانیہ والوں کو خود ان کی جماعت کی حمایت حاصل نہیں ہے۔ پوری قوم افواج پاکستان اور ملک کے سلامتی کے اداروں کے پیچھے کھڑی ہے اور لندن بیانیہ کو مسترد کرتی ہے۔ عوام الناس نے عمران خان کو ووٹ دئیے ہیں ، عمران خان کی حکومت کوہٹانے کا مطالبہ کرنے والے بتائیں کہ افواج پاکستان کو سیاست میں ملوث کرنا کون سی آئین کی بالا دستی ہے۔

علامہ طاہر اشرفی کا مزید کہنا تھا کہ وزیراعظم عمران خان کی قیادت میں ناموس مصطفیٰﷺ کے تحفظ کے لئے ہر سطح پر رابطے جاری ہیں۔ سعودی عرب، پاکستان، مصر اور دیگر اسلامی ممالک کی قیادت کو مشترکہ موقف اپناتے ہوئے اقوام متحدہ میں قانون سازی کے لئے جدوجہد کرنی چاہئے۔ ملک بھر میں ہفتہ شان و عشق مصطفیٰﷺ منایا جا رہا ہے