کورونا وائرس: پاکستان فیشن ویک آئندہ سال 2021 تک کے لئے ملتوی

کورونا وائرس کے باعث رواں برس موسم بہار اور موسم گرما میں ہونے والے پاکستان فیشن ویک کو ملتوی کردیا گیا تھا اور بعدازاں انتظامیہ نے دسمبر میں فیشن ویک کے انعقاد کا اعلان کیا تھا تاہم اب ایک بار پھر کورونا وبا کی نئی لہر کے باعث فیشن ویک کو منسوخ کر دیا گیا ہے-

باغی ٹی وی : چین کے شہر ووہان سے پاکستان سمیت دنیا بھر میں پھیلے کورونا وائرس کے باعث جہاں تمام قسم کی مذہبی ،تعلیمی اور سماجی سرگرمیوں کوبند کیا گیا تھا وہیں شوبز سر گرمیوں فلموں کی شوٹنگ اور نمائش کو بھی مؤخر کرکے سینما ہاؤسز کو بھی بند کردیا گیا تھا ساتھ ہی فیشن شوز کو بھی ملتوی کیا گیا تھا-

ستمبر میں فیشن پاکستان کونسل کی نو منتخب چیئرپرسن فیشن ڈیزائنر ماہین خان نے تصدیق کی تھی کہ فیشن پاکستان ویک (ایف پی ڈبلیو) 2020 کا انعقاد رواں برس دسمبر کو کیا جائے گا۔

ماہین خان کا کہنا تھا کہ اس سال فیشن ویک کے دوران انتہائی کم افراد کی موجودگی کو یقینی بنایا جائے گا، جبکہ سماجی دوری پر بھی عمل کیا جائے گا۔

ماہین کا کہنا تھا کہ فیشن شوز ہر کسی کے لیے نہیں ہوتے اور ان کی کوشش ہوگی کہ وہ فیشن شو کو ایک کاروبار کے طور پر چلائیں اور فالتو افراد کی عدم شرکت کو یقینی بنائیں۔

ماہین خان نے یہ بھی کہا تھا کہ کورونا وبا کے باعث اس سال کیٹ واک کرنے والی ماڈلز کو زیورات پہننے سمیت زیادہ میک اپ کرنے کی اجازت بھی نہیں ہوگی۔

تاہم اب پاکستان میں کورونا وائرس کی دوسری لہر کے کیسز میں یک دم اضافے کے باعث فیشن پاکستان ویک کو آئندہ برس تک ملتوی کردیا گیا ہے۔

اس حوالے سے فیشن پاکستان کے انسٹاگرام اکاؤنٹ پر جاری پوسٹ میں کہا گیا کہ فیشن ویک کو حفاظتی خدشات کے باعث فروری 2021 تک ملتوی کردیا گیا ہے-

پوسٹ میں مزید کہا گیا کہ ہم آپ کو آئندہ سال دیکھنے کے منتظر ہیں،گھر رہیں محفوظ رہیں-

لکھا گیا کہ ہم ایک حیرت انگیز شو کے منتظر ہیں-

فیشن پاکستان کے انسٹاگرام اکاؤنٹ پر ایک اور پوسٹ میں کہا گیا کہ کہ فیشن پاکستان ویک 2021 کے لیے ماڈلز کی ٹریننگ جاری ہے۔

دوسری جانب فیشن پاکستان کونسل (ایف پی سی) کی نو منتخب چیئرپرسن ماہین خان نے سماجی رابطے کی ویب سائٹ ٹوئٹر پر کی گئی ٹوئٹ میں بھی فیشن ویک ملتوی ہونے کی تصدیق کی۔


انہوں نے لکھا کہ فیشن پاکستان ویک 2021 کے لیے ٹریننگ جاری ہے۔

جواب چھوڑیں

آپ کا ای میل ایڈریس شائع نہیں کیا جائے گا.