پاکستان فلم انڈسٹری کا سنہرا دور واپس آرہا ہے، آمنہ الیاس

لاہور: اداکارہ و ماڈل آمنہ الیاس نے کہا کہ پاکستان فلم انڈسٹری کا سنہرا دور واپس آ رہا ہے اور غیر ملکی فلموں کی بھی مانگ کم ہونے لگی ہے.

اداکارہ و ماڈل نے ’’ایکسپریس‘‘ سے گفتگو کرتے ہوئے کہا کہ ہمارے پاس وسائل کی کمی ہے اور فلمسازی کی تربیت لینے کے لیے ادارے بھی نہیں ہیں لیکن اس کے باوجود فلم کا جو معیار ہمارے ہاں دکھائی دے رہا ہے وہ بہت سی کامیاب فلم انڈسٹریوں کا نہیں تھا۔ اگر ہم اس کو پاکستان فلم انڈسٹری کا پہلا قدم قرار دیں تو غلط نہ ہوگا کیونکہ منزل دور ہے اور راستہ بہت کٹھن، مگر وہاں تک پہنچنا ناممکن نہیں ہے۔

اداکارہ کا کہنا تھا کہ ہمارے پاس با صلاحیت فلم میکرز ،رائٹرز ،ڈائریکٹرز، موسیقار اور فنکار ہیں اور وہ یہ بھی جانتے ہیں کہ ہمارا مقابلہ جن سے ہے وہ ہر لحاظ سے ہم سے آگے ہیں لیکن ہم یہ کہہ سکتے ہیں کہ کامیابی کی طرف یہ ہمارا پہلا قدم ہے.

پڑوسی ملک میں فلمیں حکومت کی سپورٹ سے بنائی جاتی ہیں لیکن ہماری فلمیں اپنی مدد آپ کے تحت بنائی جا رہی ہیں اور اب یہ فلمیں لوگوں کی توجہ کا مرکز بن رہی ہیں اور اب اس کو روکنا کسی کے بس کی بات نہیں۔

اداکارہ نے مزید کہا کہ رواں برس میری دو فلمیں پیش کی گئی تھیں جن پر ملنے والا رسپانس میری توقعات سے بڑھ کر تھا۔ اسی طرح میں سمجھتی ہوں کہ جس انداز سے پاکستانی فلمیں بننا شروع ہو گئی ہیں اور فلم انڈسٹری میں جس طرح دن بدن نکھار آ رہا ہے وہ وقت دور نہیں جب دنیا بھر میں پاکستان فلم انڈسٹری کا چرچا ہوگا۔

جواب چھوڑیں

آپ کا ای میل ایڈریس شائع نہیں کیا جائے گا.