متحدہ عرب امارات کی دہشت گرد حملے کی مذمت، پاکستان سے اظہار یکجہتی، چین سے تعزیت کا اظہار
متحدہ عرب امارات نے پاکستان میں کراچی ائیرپورٹ کے قریب سڑک پر ہونے والے دہشت گرد حملے کی شدید مذمت کی ہے جس کے نتیجے میں دو چینی شہری ہلاک جبکہ متعدد بے گناہ افراد زخمی ہوئے ہیں۔
خبر رساں ادارے وام کے مطابق متحدہ عرب امارات کی وزارت خارجہ کی جانب سے جاری بیان میں کہا گیا ہے کہ متحدہ عرب امارات ان مجرمانہ کارروائیوں کی شدید مذمت کرتا ہے اور بین الاقوامی قوانین کی خلاف ورزی کرتے ہوئے کسی ملک کی سلامتی اور استحکام کو نقصان پہنچانے کے مقصد سے ہر قسم کے تشدد اور دہشت گردی کو مستقل طور پر مسترد کرتا ہے۔اماراتی وزارت خارجہ نے پاکستان کی حکومت اور عوام، چین کی حکومت اور عوام اور اس دہشت گردانہ جرم میں ہلاک ہونے والوں کے اہل خانہ کے ساتھ دلی تعزیت اور ہمدردی کا اظہار کیا اور ساتھ ہی تمام زخمیوں کی جلد صحت یابی کے لیے دعا کی ہے۔
