پاکستان کی معاشی اور معاشرتی ترقی میں شانہ بہ شانہ کھڑے ہیں۔یو اے ای کے سفیر حماد عبید ابراہیم

uae

متحدہ عرب امارات کے سفیر حماد عبید ابراہیم سالم الزابی نے اسلام آباد میں قومی اسمبلی کے سپیکر ایاز صادق سے ملاقات کی۔ بات چیت میں دو طرفہ تعلقات، مشترکہ مفادات اور باہمی دلچسپی کے متعلقہ امور سمیت مختلف موضوعات پر تبادلہ خیال کیا گیا۔ملاقات کے دوران سفیر الزعبی نے ایاز صادق کو قومی اسمبلی کے سپیکر کا عہدہ سنبھالنے پر مبارکباد دی۔ انہوں نے اپنے نئے عہدے پر اسپیکر کی کامیابی کے لیے نیک تمناؤں کا اظہار بھی کیا۔سپیکر ایاز صادق نے متحدہ عرب امارات کے ساتھ اپنے دیرینہ تعلقات کو فروغ دینے کے لیے پاکستان کے عزم کا اعادہ کیا۔ انہوں نے پاکستان اور متحدہ عرب امارات کے درمیان تمام شعبوں میں تعاون کو وسعت دینے میں گہری دلچسپی کا اظہار کیا۔
انکا مزید کہنا تھا کہ پاکستان علاقائی ترقی، معاشی استحکام کیلئے تمام ممالک کیساتھ وسیع بنیادوں پر تعاون کو فروغ دینا چاہتا ہے۔ ایاز صادق نے یو اے ای اسپیکر آف پارلیمنٹ کو پاکستان کے دورہ کی دعوت دی۔اماراتی سفیر حماد عبید ابراہیم سالم الزابی نے کہا کہ ان کا ملک پاکستان کے ساتھ دوستانہ و برادرانہ تعلقات کو قدر کی نگاہ سے دیکھتا ہے۔ پاکستان کی معاشی اور معاشرتی ترقی میں شانہ بہ شانہ کھڑے ہیں۔ پاکستان میں معاشی مواقع سے اماراتی سرمایہ کار استفادہ کر سکتے ہیں۔ اماراتی سفیر نے کہا پاکستان کی افرادی قوت انتہائی ماہر اور قابل ہے۔ یو اےای کی ترقی میں پاکستان کی افرادی قوت کا کردار قابل رشک ہے۔ انہوں نے کہا دونوں ممالک کے پارلیمانی وفود کے تبادلوں سے دو طرفہ ہم آہنگی میں اضافہ ہوگا۔

Comments are closed.