پاکستان شاہینز نے ایم سی سی کو 5 وکٹوں سے شکست دے دی، احسان عادل مین آف دی میچ قرار
لاہور:پاکستان شاہینز نے ایم سی سی کو 5 وکٹوں سے شکست دے دی،احسان عادل مین آف دی میچ قرار،اطلاعات کےمطابق پاکستان شاہینز اور ایم سی سی کے درمیان پچاس اوورز پر مشتمل میچ ایچیسن کالج لاہور میں کھیلا گیا۔ ایم سی سی کے دورہ پاکستان میں شامل واحد پچاس اوورز پر مشتمل میچ میں، پاکستان شاہینز نے 5 وکٹوں سے کامیابی حاصل کی۔
میزبان ٹیم کی دعوت پر پہلے بیٹنگ کرتے ہوئے ایم سی سی نے مقررہ 50 اوورز میں 9 وکٹوں کے نقصان پر 204 رنزبنائے۔ راس ویٹلے 51 رنز بناکر سب سے نمایاں بلے باز رہے۔ پاکستان شاہینز کے احسان عادل نے شاندار باؤلنگ کرتے ہوئے 6 وکٹیں حاصل کیں۔ جواب میں پاکستان شاہینز نے مطلوبہ ہدف 45 اوورز میں 5 وکٹوں کے نقصان پرحاصل کرلیا۔ عمران رفیق نے 66 رنز کی ناقابل شکست اننگز کھیلی۔
تفصیلات کے مطابق پاکستان شاہینز کے کپتان سعود شکیل نے ٹاس جیت کر پہلے فیلڈنگ کا فیصلہ کیا تو احسان عادل کی عمدہ باؤلنگ کی بدولت ایم سی سی کے ابتدائی 3 کھلاڑی 42 کے مجموعی اسکور پر پویلین واپس لوٹ گئے تاہم راس ویٹلے اور وِل روڈز نے چوتھی وکٹ کے لیے 68 رنز کی شراکت قائم کی۔ راس ویٹلے 5 چوکوں اور 3 چھکوں کی بدولت 51 جبکہ وِل روڈز 27 رنز بناکر آؤٹ ہوئے۔
جس کے بعد رولوف مروو نے رنز بنانے کا سلسلہ جاری رکھا۔ 47 رنز کی ناقابل شکست اننگز کھیلنے والے رولوف مروو نے سفیان شریف کے ہمراہ ساتویں وکٹ کے لیے 63 رنز کی شراکت قائم کی۔ پاکستان شاہینز کے احسان عادل نے 10 اوورز میں 34 رنز دے کر 6 کھلاڑیوں کو آؤٹ کیا۔ ایم سی سی نے مقررہ پچاس اوورز میں 9 وکٹوں کے نقصان پر 204 رنز بنائے۔
مطلوبہ ہدف کے تعاقب میں پاکستان شاہینز کی آدھی ٹیم 114 رنز بناکر پویلین واپس لوٹی تو بائیں ہاتھ کے بلے باز عمران رفیق اور حسن محسن نے شاندار بلے بازی کرتے ہوئے میزبان ٹیم کو فتح دلادی۔ دونوں کھلاڑیوں کے درمیان 91 رنز کی ناقابل شکست شراکت قائم ہوئی۔ عمران رفیق 66 اور حسن محسن 49 رنز بناکر ناٹ آؤٹ رہے۔ پاکستان شاہینز نے مطلوبہ ہدف 30 گیندیں قبل حاصل کرلیا۔ ایم سی سی کی جانب سے اولیور ہان نے 2 جبکہ سفیان شریف اور رولوف نے ایک ایک وکٹ حاصل کی۔
میچ میں شاندار باؤلنگ کا مظاہرہ کرنے پر فاسٹ باؤلر احسان عادل کو مین آف دی میچ قرار دیا گیا۔
ایم سی سی کرکٹ ٹیم 17فروری کو ناردرن کے خلاف ایچیسن کالج لاہور میں ٹی ٹونٹی میچ کھیلے گی۔
شیڈول:
17 فروری : ایم سی سی بمقابلہ ناردرن بمقام ایچیسن کالج لاہور بوقت دوپہر 12:30 تا سہ پہر3:40 بجے (بیس اوورز پر مشتمل میچ)
19 فروری : ایم سی سی بمقابلہ ملتان سلطانز بمقام ایچیسن کالج لاہور بوقت دوپہر 12:30 تا سہ پہر3:40 بجے (بیس اوورز پر مشتمل میچ)